भारी घाम ले जीव-जंतु मन ऊपर संकट, वन विभाग अलर्ट

प्रदेश म परत भारी घाम अउ लू (हीट वेव) के असर अब बन के जीव-जंतु मन ऊपर घलो दिखाय बर सुरू हो गए हे। खैरागढ़ वन क्षेत्र के उपवृत्त लछना के दल्लीखोली बन कक्ष क्रमांक 322 म 15 ठन बन के जीव अउ चिरई मन मृत हालत म पाए गीन। घटना के जानकारी मिलत ही वन विभाग के टीम ह तुरंते मौका म पहुंचिस अउ जांच सुरू करिस।

पहिली जांच म लू (हीट वेव) के आशंका

वन विभाग अउ पसु डॉक्टर मन के टीम ह घटना के जगह के निरिक्षण करिन। पहिली जांच म अइसन माने जात हे कि पिछले कई दिन ले इलाका म परत भारी घाम अउ लू के सेती ए घटना होए होही। जांच ल पक्का करे बर आसपास के पानी के स्रोत अउ माटी के सैंपल (नमूने) लेके लैब (प्रयोगशाला) भेजे गए हे।

बन के जीव मन के जतन बर बनाए गिस अस्थायी वाटर होल (पानी के कुंड)

भारी घाम म बन के जीव-जंतु मन ल राहत देहे बर वन विभाग ह ए इलाका म 3 ठन अस्थायी वाटर होल तैयार करे हे। ए मन म रोज दिन पीए के पानी के ब्यवस्था करे जात हे। जरूरत के हिसाब से दूसर जगह मन म घलो वाटर होल बनाए जात हे, ताकि बन के जीव मन ल पानी के कोनो कमी झन होवय।

ट्रैप कैमरा ले रखे जात हे नजर

वन विभाग ह संवेदनशील इलाका मन म पहरा अउ निगरानी ल बढ़ा दिए हे। ट्रैप कैमरा मन के माध्यम ले बन के जीव मन के आवत-जावत (गतिविधि) ऊपर लगातार नजर रखे जात हे। एकर संग म वन विभाग के अमला ह रोज गश्त (पेट्रोलिंग) करत हे, ताकि कोनो घलो आपात स्थिति म तुरंते कारवाही करे जा सके।

स्थानीय लोगन मन ले सहयोग के अपील

वन मंडलाधिकारी श्री पंकज सिंह राजपूत ह बतॉइन कि वन मंत्री श्री केदार कश्यप के निर्देश के मुताबिक विभाग ह पूरा गंभीरता ले स्थिति ऊपर नजर रखे हे। ओमन गांव के लोगन अउ आम नागरिक मन ले अपील करे हें कि यदि कोनो बन के जीव या चिरई ह घायल, बीमार, अजीब हालत म या मरे हुए दिखही, त एकर जानकारी तुरंते वन विभाग ल देवंय।

कंट्रोल रूम के नंबर जारी

वन विभाग ह मदद बर कंट्रोल रूम नंबर 247 अउ मोबाइल नंबर +91-9301321797 जारी करे हे। विभाग ह कहिहे कि बन के जीव मन के जतन अउ पर्यावरण के संतुलन ल बनाए रखे बर सबो किसम के कोसिस करे जात हे।

डीपीआर से साभार-

अंजोर: छत्तीसगढ़ी समाचार

संपादक/अनुवादक: जयंत साहू