छत्तीसगढ़ी सिनेमा डेस्क, रायपुर। सिने साउंड प्रोडक्शन के बैनर तरी बने छत्तीसगढ़ी फिलिम 'दिलदार मोर यार' अब प्रदर्शन बर तइयार हाबे। सोशल मीडिया ले मिले आरो के मुताबिक 'दिलदार मोर यार' के रिलीज डेट 29 मई 2026 बताये जात हावय। फिलिम के निर्माता हाबे नंदिता सतपथी अउ लेखक,निर्देशक हे नितेश लहरी ह। नितेश लहरी छत्तीसगढ़ी सिनेमा के अनुभवी निर्देशक आए अब तक ओमन के पहुना, सोन चिरैया, आशिक़ मयावाले, मया होगे रे, मोर बाई हाई फाई अउ मंगलसुत्र के बाद 'दिलदार मोर यार' दर्शक मनके बीच लाने हावय।
दिलदार मोर यार के कहानी के बात करे जाए तो फिलहाल मया परेम के साथ अउ का शामिल हावय येतो पूरा फिलिम देखे के बाद जानबा होही। लेकिन गीत संगीत बहुत दमदार होने वाला हावय, एक गीत 5 मई रिलीज होगे- तोर संग प्यार होगे, ल दर्शक मनके गजब मया दुलार मिलत हाबे। जइसे जइसे फिलिम के गाना मन आगू आही फिलिम के कहानी के थाह मिलत जाही। वइसे भी जादा एति-ओती करे जरूरत नइये, काबर के 29 मई 2026 के रिलीज के आरो मिलत हाबे।
दिलदार मोर यार म प्रमुख भूमिका म नजर आही अज्जु सतपथी, भूपेश लिल्हारे, दीपिका सिंह अउ कंचन विश्वकर्मा। येकर अलावा आन किरदार म विजय मिश्रा, श्वेता शर्मा, आकांक्षा देवांगन, जय गुप्ता, माही साहू, सिम्मी ध्रुव, अनिल पटेल, राजेन्द्र देवांगन, बलराज पाठक, प्रमिला रात्रे, नोखु सिंगौर, अमूल्य निधि मिश्रा, अखिलेश वर्मा, जयापति आदि।
ए फिल्म के निर्देशन के संगे संग नितेश लहरी ह कहानी, पटकथा अउ संवाद घलो लिखे हे। फिल्म के निर्मात्री नंदिता सतपथी हे। फिल्म के संगीत पक्ष घलो काफी मजबूत दिखत हे, जेकर जिम्मेदारी अज्जू सतपथी ह निभाय हे। फिल्म म गाना मन ल मोनिका वर्मा अउ अज्जू सतपथी ह अपन सुग्घर अवाज दे हावय, जबकि गीत ह सलाम ईरानी के आय। तकनीकी टीम म लक्ष्मण यादव डीओपी अउ आनंद साहू एक्शन के जिम्मदारी बखूबी निभाये हावय।
- फिल्म - दिलदार मोर यार
- निर्माता - नंदिता सतपथी
- लेखक,निर्देशक - नितेश लहरी
- छायांकन - लक्ष्मण यादव
- संपादन - गौरांग त्रिवेदी
- एक्शन - आनंद साहू,
- डांस - राम यादव,
- कैमरा - लक्ष्मण यादव,
- गीत - सलाम ईरानी,
- संगीत - अज्जु सतपथी,
- स्वर - अज्जु सतपथी व मोनिका वर्मा
- मेकअप - रज्जु
- कॉस्ट्यूम - लवकुमार
- भाषा - छत्तीसगढ़ी
- प्रदर्शन - 29 मई 2026
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।