आदिवासी संस्कृति अउ परंपरा मन के जतन बर सरकार प्रतिबद्ध: उप मुख्यमंत्री श्री शर्मा

मोहला-मानपुर-अम्बागढ़ चौकी जिला के वनांचल इलाका पानाबरस म आदिम आसा के ठउर मन के जतन, संवर्धन अउ जनजातीय संस्कृति सुरक्षा अभियान के तहत एक बड़ महासभा के आयोजन करे गिस। ए कार्यक्रम म छत्तीसगढ़ सरकार के उप मुख्यमंत्री अउ प्रभारी मंत्री श्री विजय शर्मा के संग राजनांदगांव लोकसभा सांसद श्री संतोष पांडे घलो सामिल होइन। कार्यक्रम म पूरा जिला भर ले बड़ संख्या म आदिवासी समाज के मांझी, गायता, ग्राम पटेल, गांव के सियान अउ समाज के प्रमुख मन पहुंचिन।

कार्यक्रम के सुरूआत पारंपरिक आदिवासी रीति-रिवाज अउ पूजा-अर्चना के संग करे गिस। अतिथि मन के पारंपरिक तरीका ले सुवागत करत हुए आदिवासी संस्कृति के सुंदर झलक देखाय गिस। सभा म जनजातीय समाज के समृद्ध परंपरा, संस्कृति अउ पुरखा मन के आसा ले जुड़े ठउर मन के जतन अउ बढ़ावा देहे बर बड़ गोठ-बात होईस।

महासभा म उप मुख्यमंत्री श्री विजय शर्मा ह आदिवासी समाज के मांझी, गायता अउ गांव के सियान मन से सीधा गोठ-बात (संवाद) करिन अउ उनकर परंपरा, सामाजिक व्यवस्था अउ धार्मिक आसा ले जुड़े जानकारी मन ल जानिन। ओमन कहिन कि आदिवासी समाज के संस्कृति, परंपरा अउ देवस्थल हमर अमूल्य धरोहर आय, जेकर जतन करना सरकार के पहिली प्राथमिकता हे। ओमन आगे कहिन कि जंगल अउ पहाड़ी इलाका मन म जे देवगुड़ी, आसा के ठउर अउ पुरखा मन के सुरता ले जुड़े जगह हे, ओकर पहिचान करके वहां जरूरी बुनियादी सुविधा मन दिए जाही। ए जगह मन तक पहुंचे बर रद्दा (पहुंच मार्ग), पीए के पानी, बइठे के ब्यवस्था अउ दूसर मूलभुत सुविधा मन के विकास बर कार्ययोजना बनाए जाही, ताकि आघू के पीढ़ी घलो अपन सांस्कृतिक विरासत ले जुड़े रहे।

उप मुख्यमंत्री श्री शर्मा ह कहिन कि छत्तीसगढ़ सरकार ह आदिवासी समाज के संस्कृति अउ परंपरा मन ल सुरक्षित रखे बर लगातार मिहनत करत हे। ओमन समाज के सियान मन ले अपील करत कहिन कि नवा पीढ़ी ल अपन संस्कृति, बोली-बानी, रीति-रिवाज अउ परंपरा मन ले जोड़के रखे म सबो के बड़ भूमिका हे। राजनांदगांव लोकसभा सांसद श्री संतोष पांडे ह घलो सभा म अपन बात रखिन अउ कहिन कि आदिवासी समाज के सांस्कृतिक पहिचान अउ पारंपरिक आसा के ठउर मन के जतन करना समाज के अस्मिता अउ मान-समान से जुड़े बिसय आय।

ओमन कहिन कि केंद्र अउ राज्य सरकार ह जनजातीय समाज के सामाजिक, सांस्कृतिक अउ आर्थिक बिकास बर अब्बड़ सारी योजना मन के माध्यम ले काम करत हे। कार्यक्रम म समाज के सियान मन कोति ले आदिवासी संस्कृति अउ आसा के ठउर मन के जतन बर सरकार कोति ले करे जात कोसिस मन के तारीफ करे गिस। ए मौका म जिला पंचायत अध्यक्ष श्रीमती नम्रता सिंह, जिला पंचायत उपाध्यक्ष श्री भोजेश शाह मांडवी के संग दूसर जनप्रतिनिधि अउ आदिवासी समाज के अलग-अलग समाज प्रमुख अउ गणमान्य नागरिक मन उपस्थित रहिन।

डीपीआर से साभार-

अंजोर: छत्तीसगढ़ी समाचार

संपादक/अनुवादक: जयंत साहू