वन धन विकास केंद्र ह बदलिस आदिवासी महिला मन के तकदीर

छत्तीसगढ़ सासन के महत्वाकांछी वन धन विकास केंद्र (वीडीवीके) योजना के बढ़िया क्रियान्वयन ले कोरबा जिला के कटघोरा वन प्रभाग के तहत डोंगनाला के आदिवासी महिला मन ह आत्मनिर्भरता के नवा मिसाल कायम करे हें। डोंगनाला के हरिबोल स्व-सहायता समूह ह आज हर्बल उद्यम के माध्यम ले महिला ससक्तीकरन के एक आदरस बनके उभरे हावय।

रोजहा मजूरी ले सफल उद्यमिता तक के जातरा

मुख्यमंत्री विष्णु देव साय के अगुवई अउ वन मंत्री केदार कश्यप के मनसा के मुताबिक 12 आदिवासी महिला मन ले बने ये समूह के सदस्य मन पहिली रोजहा मजूरी म निर्भर रहिन। सीमित रोजगार अउ अस्थिर आय के सेती परिवार के जरूरत ला पूरा करना उंकर बर चुनौती भरे रहिस। फेर सासन के वन धन विकास केंद्र योजना ले जुड़े के बाद ये महिला मन के जीवन म सकारात्मक बदलाव आइस।

प्रशिक्षण अउ तकनीकी सहयोग ले मिलिस नवा चिनहारी

स्थानीय स्तर म उपलब्ध जड़ी-बूटी अउ लघु वनोपज के संभावना ला देखत महिला मन ला संगठित करे गिस। उमन ला आयुर्वेद बिसेसज्ञ अउ छत्तीसगढ़ राज्य लघु वन उत्पाद (ब्यापार अउ विकास) सहकारी संघ लिमिटेड डहर ले हर्बल प्रसंस्करण (प्रोसेसिंग), गुणवत्ता नियंत्रण, पैकेजिंग, ब्रांडिंग अउ विपणन (मार्केटिंग) के बिसेस प्रिसिक्छन देय गिस।

हर्बल उत्पाद मन के बाढ़िस मांग

प्रिसिक्छन पाए के बाद समूह ह त्रिफला चूर्ण, अश्वगंधा चूर्ण, हर्बल फेस पैक, हर्बल हेयर पाउडर अउ टूथ पाउडर जइसे गुणवत्ता वाले हर्बल उत्पाद तइयार करना सुरू करिस। अपन गुणवत्ता अउ प्रभावसीलता के कारन ये उत्पाद मन के स्थानीय अउ संस्थागत बजार म बनेच मांग बनिस।

आयुष विभाग ले मिलिस बड़े आर्डर

समूह ला ओ बेरा बड़ सफलता मिलिस जब उमन ला आयुष विभाग ले बड़े आर्डर मिलिस। ये आर्डर ले समूह ला करीब 20 लाख रुपिया के फायदा होइस। एकर ले समूह के बिस्वसनीयता बाढ़िस अउ नवा बजार के रद्दा खुल गिस।

38.90 लाख रुपिया के फायदा, आर्थिक स्थिति होइस मजबूत

वित्तीय बछर 2024-25 म समूह ह करीब 38.90 लाख रुपिया के फायदा अउ कमीशन कमाइस। एकर ले सदस्य मन अउ उंकर परिवार के आर्थिक स्थिति मजबूत होइस अउ जीवन स्तर म बनेच सुधार आइस।

26.11 करोड़ रुपिया के कुल बिक्री

बछर 2020 ले मार्च 2026 तक वीडीवीके डोंगनाला ह करीब 26.11 करोड़ रुपिया के कुल बिक्री दरज करे हे। ये उपलब्धि समूह के लगातार मिहनत, गुणवत्तापूर्ण उत्पादन अउ प्रभावी विपणन (मार्केटिंग) रणनीति के नतीजा आय।

हर सदस्य के आमदनी पहुंचिस 1.7 लाख रुपिया सालाना

ये पहल ले समूह के हर सदस्य के सालाना आमदनी बाढ़ के करीब 1.7 लाख रुपिया हो गे हे। आर्थिक आत्मनिर्भरता के संग-संग महिला मन म आतंमबिस्वास, नेतृत्व छमता अउ निरनय लेय के ताकत घलो बाढ़ हे।

राष्ट्रीय स्तर म मिलिस चिनहारी

हर्बल प्रोसेसिंग अउ महिला ससक्तीकरन के छेत्र म उत्कृस्ट काम बर समूह ला ट्रायफेड (TRIFED) अउ छत्तीसगढ़ सासन डहर ले सम्मानित करे जा चुके हे।

दूसर समूह मन बर प्रेरणा

हरिबोल स्व-सहायता समूह के सफलता ये साबित करथे के सासन के योजना मन, कौसल विकास, संस्थागत सहयोग अउ बजार के उपलब्धता के माध्यम ले आदिवासी महिला मन ला आत्मनिर्भर बनाए जा सकत हे। डोंगनाला के ये सफलता आज पूरा प्रदेस अउ देस के स्व-सहायता समूह मन बर प्रेरणा के स्रोत बन गे हावय।

साभार: डीपीआर

अंजोर: छत्तीसगढ़ी समाचार

संपादक: जयंत साहू