अंतरराष्ट्रीय भरथरी गायिका सुरूज बाई खांडे जी ल अम्मर राखे अउ भरथरी विधा ल मान देवाय खातिर सुरूज ट्रस्ट डहर ले हरेक बछर सुरूज सम्मान के आयोजन उंकर जनमदिन के मउका म करे जाथे। इही ओड़र म एसो 12 जून के केशकाल के टाटामारी म 'सुरूज उत्सव' अउ 'सुरूज सम्मान समारोह' के आयोजन करे गे हावय। जेमा छत्तीसगढ़ के लोक कला, संस्कृति अउ समाज सेवा के क्षेत्र म जबर बुता करइया व्यक्तित्व मन ला सम्मानित करे जाही।
केशकाल, छत्तीसगढ़: अंतरराष्ट्रीय भरथरी गायिका सुरूज बाई खांडे जी के जनम दिन के पावन अवसर में, सुरूज ट्रस्ट ह 12 जून 2026 के केशकाल के प्राकृतिक सुंदरता ले भरे टाटामारी में भव्य 'सुरूज उत्सव' अउ 'सुरूज सम्मान समारोह' के आयोजन करत हे। ए कार्यक्रम बिहिनिया 11 बजे ले सुरु होही।
मुख्य अतिथि अउ कार्यक्रम के रूपरेखा
ए गरिमामयी समारोह म इंग्लैंड ले आए पर्यटन संचालक अउ समाज सेविका सोफी हार्टमेन मुख्य अतिथि रइही। कार्यक्रम के अध्यक्षता प्रख्यात लोक साहित्यकार रुद्र नारायण पाणिग्रही करही। विशिष्ट अतिथि के रूप म पत्रकार अउ समाज सेवक कृष्णदत्त उपाध्याय अउ वन मंडल अधिकारी श्रीमती दिव्या गौतम कार्यक्रम म शामिल होही।
जॉन ब्यूमोंट ऐश के दुर्लभ फोटो प्रदर्शनी
ए समारोह के सबले बड़े आकर्षण जॉन ब्यूमोंट ऐश के खींचे फोटो प्रदर्शनी होही, जऊन ह बस्तर के संस्कृति ल दुनिया ला देखाही। ए फोटो प्रदर्शनी ह मुड़िया गोंड समुदाय के जीवन अउ बस्तर के अमूल्य धरोहर के जीवंत दस्तावेज़ हे।
मिलही 'सुरूज सम्मान 2026'
ए बछर अलग-अलग क्षेत्र में आपन छाप छोड़इया प्रतिभा मन ला सम्मानित करे जाही:-
- कला अउ संस्कृति: गंगा देवी भट्ट, राजकुमार कोर्राम (काष्ठ शिल्प); हिमानी वासनिक (भरथरी गायन); अगरबत्ती पोयाम, सुरेश पोयाम (लौह शिल्प); लालजी कोर्राम (अभिनय); लतिका वैष्णव, सुभाष पांडे (चित्रकला); सिकंदर बघेल (घड़वा कला); उदेलाल मारकंडे (पंथी लोक गीत); मालती ध्रुव (नाट्य अभिनय)।
- साहित्य अउ सेवा: डॉ. किरण नुरूटी, शिव कुमार पांडे (साहित्य); कृष्णदत्त उपाध्याय (समाज सेवा); मनोज गोयल, प्रकाश नाग (पत्रकारिता); वनिका (महिला सशक्तिकरण); लक्ष्मी साहू, रिज़वान खान (पर्यटन); रमेश कुमार जैन (वन्यजीव संरक्षण); लाल बहादुर (वाइल्डलाइफ फोटोग्राफी); रुद्र नारायण पाणिग्रही (सुरूज सृजन सम्मान)।
ए आयोजन सेवा, समर्पण अउ सृजन के ओ प्रेरणादायी यात्रा के हिस्सा हे, जऊन ह समाज ला नवा दिशा अउ ऊर्जा देथे। ये कार्यक्रम खातिर आयोजक मन डहर ले कला, साहित्य अउ संस्कृति ले जुड़े लोगन मनला नेवता पठोयव गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।