प्रदेश म खनिज संपदा ला बचाय बर अउ अवैध उत्खनन (बिना अनुमति खोधई) ऊपर रोक लगाय बर प्रशासन ह लगातार सख्ती बरतत हे। एही कड़ी म बलरामपुर जिला म खनिज विभाग अउ संयुक्त टीम ह अवैध रेती अउ माटी ईंटा के ढोवाई (परिवहन) के खिलाफ बड़ कार्रवाई करत हुए 6 गाड़ी मन ला जब्त करे हे। ए कार्रवाई के बाद अवैध खनिज के हेराफेरी करइया मन म हड़कंप मच गे हे।
जानकारी के मुताबिक विकासखंड राजपुर के अंतर्गत ग्राम गोपालपुर अउ कर्रा क्षेत्र म संयुक्त टीम कोती ले जांच अभियान चलाए गिस। ए दौरान अवैध रूप ले रेती ले जावत 4 गाड़ी अउ माटी ईंटा परिवहन म लगे 2 गाड़ी मन ला पकड़े गिस। जांच के बखत गाड़ी चलाइया मन कोती ले जरूरी कागज अउ वैध अनुमति (पास) नहीं दिखाए बर सब्बो गाड़ी मन ला जब्त कर राजपुर थाना के सुपुर्द कर दे गिस।
खनिज विभाग ले मिले जानकारी के मुताबिक गोपालपुर क्षेत्र म एक रेती के गाड़ी अउ एक माटी ईंटा के गाड़ी अवैध परिवहन करत पाए गिस, उहें ग्राम कर्रा क्षेत्र म तीन रेती के गाड़ी अउ एक माटी ईंटा के गाड़ी बिना कोनो वैध अनुमति के चलत रहिस। संयुक्त टीम ह मौका म कार्रवाई करत हुए सब्बो गाड़ी मन ला जब्त करिस।
खनिज विभाग के अधिकारी मन ह बताइन कि जिला म अवैध खोधई अउ परिवहन ऊपर रोक लगाय बर लगातार निगरानी रखे जावत हे। सरकार के निर्देशानुसार खनिज संपदा के सुरक्षा बर संयुक्त रूप ले मॉनिटरिंग अउ जांच अभियान आगू घलो जारी रही। अधिकारी मन ह साफ कहिन कि अवैध काम मन म सामिल मनखे मन के खिलाफ खनिज नियम के तहत कड़ा कार्रवाई करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।