भारत सरकार के जनजातीय कार्य मंत्रालय के निर्देशानुसार आज बालोद जिला के डौण्डी विकासखण्ड के ग्राम भैंसबोड़ म सुशासन तिहार के मौका म जनजातीय गरिमा उत्सव 2026 के शुभारंभ करे गिस। ए अवसर म कलेक्टर श्रीमती दिव्या उमेश मिश्रा ह सब्बो विभाग के मुखिया मन ला ए उत्सव के माध्यम ले जनजातीय हितग्राही मन ला सरकार के जनकल्याणकारी योजना मन के लाभ देवाए बर जरूरी दिशा-निर्देश दिन। ए मौका म सब्बो विभाग प्रमुख मन ला कार्यक्रम के रूपरेखा के जानकारी देहे के संग कार्ययोजना के बारे म घलो समझाय गिस।
सहायक आयुक्त आदिवासी विकास श्री विजय सिंह कंवर ह बताइन कि बालोद जिला म 18 ले 25 मई तक आयोजित ए जनजातीय गरिमा उत्सव के दौरान धरती आबा के अंतर्गत जिला के चुने हुए आदिवासी बहुल (जादा आबादी वाले) गांव मन म अलग-अलग गतिविधि मन के आयोजन करे जाही।
बता दन कि जनजातीय गरिमा उत्सव के ए देसभर के कार्यक्रम के दौरान जनजातीय समाज के गरिमा, परंपरा, ओकर योगदान अउ उपलब्धि मन के सम्मान पक्का करे के संग जनजातीय कार्य मंत्रालय कोती ले आदिवासी मन के पूरा बिकास अउ ओमन ला मजबूत बनाए बर चलाए जावत अलग-अलग योजना मन के बदलाव अउ असर ला सोझा लाए के कोसिस करे जाही।
ए उत्सव ह एक जनभागीदारी अभियान (सब्बो झन के मिल के चले वाला) आय, जेखर थीम ‘‘सबसे दूर, सबसे पहले’’ रखे गे हे। ए दौरान ओमन हर दिन आयोजित होइया अलग-अलग काम मन के ऊपर घलो गोठबात करिन। ओमन बताइन कि एखर तहत योजना मन के नीक जतन ले प्रचार-प्रसार, हितग्राही मन ला पूरा लाभ देवई, स्वास्थ्य शिविर (दवाई-पानी के कैंप), ट्रांसेक्ट वॉक, रुख-राई लगाना (वृक्षारोपण) अउ सेवा केंद्र म जनसुनवाई जइसन कतको गतिविधि मन सामिल हें।
ए मौका म राज्य एथेलेटिक संघ के उपाध्यक्ष श्री सौरभ लुनिया, जनपद अध्यक्ष श्री मुकेश कौड़ो, जनपद उपाध्यक्ष श्री भोलाराम नेताम, जिला पंचायत के मुख्य कार्यपालन अधिकारी श्री सुनील चंद्रवंशी, अपर कलेक्टर श्री चंद्रकांत कौशिक के संग दूसर जनप्रतिनिधि मन घलो उपस्थित रहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।