'मोला लव होगे' में आयुष राजवैद्य अउ तिरांजलि गोस्वामी के डेब्यूट जोड़ी, 8 मई ले मचाही धमाल

छत्तीसगढ़ी सिनेमा म अब फेर नवा जोड़ी के आगाज होवत हाबे फिलिम 'मोला लव होगे' ले। मिले आरो के मुताबिक नवोदित कलाकार आयुष राजवैद्य और तिरांजलि गोस्वामी अभिनीत फिलिम 'मोला लव होगे' ह उंकर पहिली फिलिम आए। निर्माण अनुमोद फिल्म्स के बैनर करे गे हावय जेकर निर्माता अउ निर्देशक अनुमोद राजवैद्य हावय। फिलिम म 8 मई ले छत्तीसगढ़ी के सिनेमाघर म प्रदर्शित होही।

आयुष राजवैद्य अउ तिरांजलि गोस्वामी के जोड़ी

फिलिम 'मोला लव होगे' जइसे के एक मया पिरित के कहानी आए, येमा आयुष राजवैद्य अउ तिरांजलि गोस्वामी के कॉलेज लाइफ के मया के कहानी हावय। दूनो के कॉचा उमर के मया म कोन—कोन दुस्मन बनके आगू आही अउ कइसे ढंग ले उंकर मया ह परवान चढ़ही, ये तो पूरा फिलिम देखे के बादे पता चलही। लेकिन आयुष राजवैद्य अउ तिरांजलि गोस्वामी के अभिनय ह लोगन मनला गीत रिलीज ले ही पसंद आगे हावय। 

​मया के संग दिखही जबरदस्त एक्शन

​फिल्म के टीजर म जबरदस्त अंदाज म कलाकार मनके एक्शन अउ डायलाग के बानगी देखे कर मिलथे। फिलिम म जिहाँ एक कोति मया-पिरीत के कोमल अहसास दिखत हे, त दूसर कोति खून ले सने तलवार अउ बंदूक के ललकार ह फिल्म म जबरदस्त 'एक्शन' अउ 'थ्रिलर' होय के संकेत देवत हे। येमा आयुष राजवैद्य अउ तिरांजलि गोस्वामी के अलावा करण खान, रजनीश झांझी, पुष्पेन्द्र सिंह, संजय महानंद जइसे अनुभवी कलाकार मन सिनेमा ल बांधे रखे हावय।

तकनीकी पक्ष अउ मधुर संगीत

फिलिम के संगीत अनुग्रह गाडियन, प्रदीप साटिया अउ ओंकार चौहान ह तैयार करे हे, जेला अनुराग शर्मा, सुनील सोनी अउ दीक्षा धनगर ह अपन सुघ्घर आवाज ले सजाए हे। गीत ओंकार चौहान, दीपिका धनगर अउ खुद अनमोद राजवैद्य ह लिखे हे। राजू देवदास के छायांकन ह छत्तीसगढ़ के सुघ्घर दृश्य मन ल कैद करे हे। उहें मयंक रैकवार के वीएफएक्स अउ नीरज वर्मा के संपादन फिलिम ल अंतर्राष्ट्रीय स्तर के अनुभव प्रदान करही। 8 मई ले आप मन अपन नजदीकी टॉकीज म जाके ये फिल्म के आनंद उठा सकत हव।

• फ़िल्म: मोला लव होगे
• निर्माता: अनुमोद राजवैद्य
• निदेशक: अनुमोद राजवैद्य
• मुख्य सहायक निदेशक: श्रीमंत बारिक
• क्रिएटिव डायरेक्टर: प्रीति राजवैद्य
• कलाकार: आयुष राजवैद्य, तिरांजलि गोस्वामी, करण खान, रजनीश झांझी, पुष्पेन्द्र सिंह, संजय महानंद, जागेश्वरी मेश्राम, विक्रम राज, मास्टर कबीर, बेबी कनिष्का बेडेकर।
• संगीत: ओंकार चौहान
• गीतकार: दीपिका धनगर
• गायक: अनुराग शर्मा, सुनील सोनी, दीक्षा धनगर
• छायाकार: राजू देवदास
• संपादन: नीरज वर्मा
• कोरियोग्राफर: मनोज दीप
• प्रोडक्शन मैनेजर: राजू नागरची
• भाषा: छत्तीसगढ़ी
• प्रदर्शन : 8 मई 2026