रायपुर: छत्तीसगढ़ी सिनेमा (Chhollywood) म एक बार फेर बड़का धमाका, अनमोद फिल्म्स के बैनर तले बने नवा फिल्म 'मोला लव होगे' के पोस्टर ह रिलीज होते ही सोशल मीडिया म तहलका मचा दे हे। निर्माता-निर्देशक अनमोद राजवैद्य के ये महात्वाकांक्षी फिल्म 8 मई 2026 ले प्रदेश के सबो प्रमुख सिनेमाघर मन म एक साथ प्रदर्शित होही।
मया के संग दिखही जबरदस्त एक्शन
फिल्म के नवा पोस्टर म जहाँ एक कोति मया-पिरीत के कोमल अहसास दिखत हे, त ओहे कोति दूसर डहर खून ले सने तलवार अउ बंदूक धरे कलाकार मन ह फिल्म म जबरदस्त 'एक्शन' अउ 'थ्रिलर' होय के संकेत देवत हें। पोस्टर म मुख्य नायक के रौद्र रूप अउ विलेन मन के खूंखार अंदाज ह दर्शक मन के रोंगटा खड़ा कर देहे बर काफी हे।
दिग्गज कलाकार मन के जमी महफिल
ये फिल्म म छत्तीसगढ़ी फिल्म इंडस्ट्री के नामी चेहरा मन नजर आही। पोस्टर मनायक नायिका के अलावा कारण खान रजनीश झांझी पुष्पेंद्र सिंह अउ अनील शर्मा जइसन मंझे हुए कलाकार मन के मौजूदगी ले ये साफ हो गे हे कि फिल्म के कहानी अउ अभिनय बहुत दमदार होही। मया के ये अनोखा कहानी म पारिवारिक ड्रामा के संग संग समाज के कतिपय पहलू मन ला घलो दिखाए के कोसिस करे गे हे।
फिल्म के तकनीकी पक्ष (Credits):
फिल्म ला सजाए म चलीवुड के दिग्गज तकनीशियन मन के हाथ हे:
- संगीत: अनुग्रह गाडियन, प्रदीप साटिया अउ ओंकार चौहान ह मधुर धुन पिरोए हें।
- गीत: ओंकार चौहान, दीपिका धनगर अउ खुद अनमोद राजवैद्य ह लिखे हें।
- छायांकन (DOP): राजू देवदास के कैमरा ले छत्तीसगढ़ के सुघ्घर दृश्य मन ला कैद करे गे हे।
- कोरियोग्राफी: मनोज दीप ह कलाकार मन ला अपन इशारा म नचाए हें।
तैयारी हे खास
निर्देशक अनमोद राजवैद्य के कहना हे कि— "हमन एक अइसन फिल्म बनाए के कोसिस करे हवन, जेला पूरा परिवार एक साथ बइठ के देख सकय। एमा मया घलो हे, तकरार घलो हे अउ अपन हक बर लड़े के जज्बा घलो हे।"
8 मई ले आप मन अपन नजदीकी टॉकीज म जाके ये फिल्म के आनंद उठा सकथौ। फिल्म के ग्राफ़िक्स के काम मयंक रैकवार अउ संपादन नीरज वर्मा ह करे हें, जेकर ले फिल्म ह अंतर्राष्ट्रीय स्तर के अनुभव प्रदान करही।
मुख्य समाचार सारांश:
- फिल्म: मोला लव होगे
- रिलीज: 08 मई 2026
- प्रमुख आकर्षण: एक्शन, रोमांस अउ सुघ्घर संगीत।
तैयार रहव संगी मन, अपन चहेता कलाकार मन ला बड़का पर्दा म देखे बर!
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।