रायपुर (सक्ती)। छत्तीसगढ़ के सक्ती जिला ले एक बड़का दुखद समाचार आगू आईस। सिंघीतराई के वेदांता पावर प्लांट (Vedanta Power Plant Sakti) में जबर होय दुर्घटना होगे जेमा केऊ झिन मजदूर मनके मउत अउ घायल होए के आरो मिले हावय। मुख्यमंत्री विष्णुदेव साय ह गहिर दुख जताइस अउ शासन डहर ले पीड़ित परिवार मन बर आर्थिक मदद के घोसना करे हे।
पीड़ित मन ला मिलही आर्थिक संबल
मुख्यमंत्री ह कहिन कि सरकार ए कठिन समय में मजदूर मन के संग खड़े हे। ओमन राहत रासि के एलान करत बताइन कि:
मृतक मन के परिजन ला: 5-5 लाख रुपिया के सहाइता रासि।
घायल मजदूर मन ला: 50-50 हजार रुपिया के आर्थिक मदद।
सीएम ह अधिकारी मन ला कड़ा निर्देश दईस हें कि घायल मन के मुफत अउ सुघ्घर इलाज सुनिश्चित करे जाय। इलाज में कोनो भी किसम के कोताही बर्दाश्त नई करे जाय।
बिलासपुर कमिश्नर करही पूरा मामला के जांच
हादसा के गंभीरता ला देखत मुख्यमंत्री ह कमिश्नर बिलासपुर ला तुरंत जांच के आदेश दे दईस हें। श्री साय ह साफ कहिन हें कि ए दुर्घटना बर जे मन भी दोसी पाय जाही, ओखर ऊपर सख्त कानूनी कारवाही करे जाही।
राज्य सरकार ह पूरा मामला ऊपर अपन नजर बनाय हुए हे। राहत अउ पुनर्वास के काम ला प्राथमिकता ले करे के निर्देश दे गे हे ताकि प्रभावित परिवार मन ला हर संभव मदद मिल सके।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।