रायपुर, 6 अप्रैल 2026। मुख्यमंत्री विष्णु देव साय ह जांजगीर-चांपा जिला के युवा पर्वतारोही सुश्री अमिता श्रीवास ल उनकर माउंट एवरेस्ट अभियान बर बधाई अउ शुभकामना दीस।
मुख्यमंत्री साय ह राजधानी रायपुर म मुख्यमंत्री निवास म पर्वतारोही सुश्री अमिता श्रीवास ले मुलाकात के बखत कहिन कि- "आगू 9 अप्रैल के सुश्री अमिता दुनिया के सबले ऊँचा चोटी माउंट एवरेस्ट म तिरंगा फहराय के संकलप के संग काठमांडू बर रवाना होवत हें। ये सिरिफ एक झन के सफलता के जात्रा नोहय, बल्कि पूरा छत्तीसगढ़ के आस, साहस अउ बिसवास के ऊँची उड़ान आय।"
ओमन कहिन कि अमिता के ये अभियान ए बात के परमान आय कि अगर संकलप पक्का होवय, त कोनो घलो ऊँचाई असंभव नइ रहय। परदेस के बेटी मन आज हर क्षेत्र म अपन बुता अउ मिहनत ले नवा पहिचान बनावत हें अउ छत्तीसगढ़ के मान बढ़ावत हें।
मुख्यमंत्री साय ह बताइन कि अमिता श्रीवास ह बछर 2021 म 'अंतरराष्ट्रीय महिला दिवस' के मउका म माउंट किलिमंजारो ल फतह करके पहिली ही अपन ताकत अउ हिम्मत के परिचय दे देहे। उनकर ये लगातार कोसिस ह न केवल एक उपलब्धि आय, बल्कि परदेस के युवा पीढ़ी, खास करके बेटी मन बर एक जीयत-जागत प्रेरणा आय।
ओमन बिसवास जताइन कि अमिता अपन ए साहसिक अभियान म सफलता पाके दुनिया के सबले ऊँचा चोटी म देस के तिरंगा फहराही अउ छत्तीसगढ़ समेत पूरा रास्ट्र के गौरव बढ़ाही।
मुख्यमंत्री ह सुश्री अमिता श्रीवास ल ए बड़का अभियान बर जम्मो परदेसवासी मन कोती ले गाड़ा-गाड़ा बधाई दीस अउ उनकर उज्ज्वल भविष्य के कामना करीन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।