उप मुख्यमंत्री अउ गृह मंत्री विजय शर्मा के बाजा-गाजा के संग लड्डू ले तउल के जम्मो समाज अउ संगठन मन करिन सम्मान

रायपुर, 06 अप्रैल 2026। छत्तीसगढ़ समेत पूरा देस बर ओ ऐतिहासिक बखत आइस, जब केंद्रीय गृह मंत्री अमित शाह ह 31 मार्च के सदन म सशस्त्र नक्सलवाद के खतम होय के घोसना करिन।लगभग चार दसक ले ए समस्या ले जूझत छत्तीसगढ़ ह मुख्यमंत्री विष्णुदेव साय के अगुवाई अउ परदेस के उप मुख्यमंत्री व गृह मंत्री विजय शर्मा के पक्का निरनय, रणनीति अउ लगातार कोसिस ले ए बड़का सफलता हासिल करीस।

ए अभियान म भारतीय सेना, पुलिस अउ जम्मो सशस्त्र बल के जवान मन के अदम्य साहस, समाज के जागरूक भागीदारी, राजनीतिक इच्छाशक्ति, पत्रकार भाई मन के भूमिका अउ सबले बढ़के बस्तर के नागरिक मन के सहयोग के बहुत बड़का योगदान रहिस। सबो के मिलजुल के कोसिस ले ही सशस्त्र नक्सलवाद के अंत संभव हो पाइस अउ अब बस्तर म खुशहाली के नवा सुरुआत होवत हे।

कवर्धा म ऐतिहासिक स्वागत

सशस्त्र नक्सलवाद ले मुक्त छत्तीसगढ़ बने के बाद, उप मुख्यमंत्री अउ गृह मंत्री विजय शर्मा ह रविवार के अपन विधानसभा क्षेत्र कवर्धा पहिली बार पहुँचीन। जहाँ स्थानीय महामाया चौक म कवर्धा के मनखे मन ह उनकर बर भव्य ऐतिहासिक नागरिक अभिनंदन समारोह राखिन। एमां हज़ारों के संख्या म लोगन मन बाजा-गाजा, ढोल-नगाड़ा के संग सामिल होइन अउ पूरा सहर म जसन के माहौल दिखिस। सबो ल ए बात के गरब रहिस कि कभू नक्सल प्रभावित जिला रहिस कबीरधाम के संग अब पूरा छत्तीसगढ़ ले डर अउ आतंक ल दूर करे मं उनकर अपन माटी पुत्र के बड़का योगदान हे।

लड्डू ले तउलिन गृह मंत्री ल

ए कार्यक्रम म ब्राह्मण, यादव, ठाकुर, कुर्मी, साहू, सतनामी, निर्मलकर, गुप्ता, अहिरवार, लोधी, पटेल, गोंड, केसरवानी, सेन, गंधर्व, स्वर्णकार, जैन, वैष्णव समेत जम्मो समाज मन ह भव्य रैली निकाल के ए असंभव काम ल पूरा करे बर शुभकामना दीस। जिला प्रेस क्लब, यूथ क्लब, हरीतिमा परिवार, प्राइवेट स्कूल संघ, नाथ योगी समाज, फाइटर क्लब अउ भाजपा के कार्यकर्ता मन घलो सामिल होइन। ए मउका म जम्मो झन ह गृह मंत्री विजय शर्मा ल लड्डू ले तउल के उनकर सम्मान करीन।

बस्तर के गाँव मं अब रौनक हे

उप मुख्यमंत्री शर्मा ह गायत्री मंदिर अउ गुरुद्वारा जाके परदेस के सांति बर पराथना करीन अउ अमर शहीद जवान मन ल श्रद्धांजलि दीन। ओमन कहिन कि- "मैं आप जम्मो मन के मया ले गदगद हंव। माओवाद एक अइसन विचार रहिस जेकर उदेस्य सिर्फ बंदूक के नली ले सत्ता पाना रहिस, जबकि भारत के लोकतंत्र बहुत जुन्ना अउ मजबूत हे।"

ओमन आगू कहिन कि- "जब बस्तर के पीड़ित मन दिल्ली म केंद्रीय गृह मंत्री अमित शाह ले मिलिन, तब ओमन संकलप ले रहिस कि 31 मार्च 2026 तक छत्तीसगढ़ ल नक्सल मुक्त करे जाही, अउ आज ओ संकलप पूरा होगे। आज बस्तर के गाँव म मनखे मन अपन अंगना म खुल के हँसत हें। अब उहाँ डर नइ हे, विकास के बात होत हे। गाँव के मड़ई-मेला म रौनक लहुट आए हे, ये बदलाव ही हमर सबले बड़का उपलब्धि आय।"

अन्तिम म ओमन प्रधानमंत्री नरेंद्र मोदी के नेतृत्व के तारीफ करत कहिन कि जइसन राम मंदिर अउ धारा 370 के काम पूरा होइस, ओइसने नक्सल समस्या के समाधान घलो संभव हो पाइस। ओमन कवर्धा के जनता के हृदय ले आभार मानिन।