रायपुर: राजधानी रायपुर के भाटागांव के निजी हॉस्पिटल म आज भारी हंगामा होइस। 'छत्तीसगढ़िया क्रान्ति सेना' (गैर राजनीतिक संगठन) ह पीड़ित परिवार ल न्याय देवाये बर अस्पताल पहुंचके मोर्चा खोल दीस। आरोप हे कि अस्पताल प्रबंधन ह इलाज के नांव म गरीब जनता ल लूटे के अड्डा बना डारे हे।
का हे पूरा मामला?
पीड़ित परिवार के कहना हे कि अस्पताल ह इलाज के नांव म लाखों रुपिया डकार लीस, ओकर बाद घलो मरीज के जान नइ बच पाइस। हद त तब हो गे जब अस्पताल प्रबंधन ह मरे के बाद घलो लाश ल देहे बर मना कर दीस अऊ अउ पैसा के मांग करे लगिस।
अस्पताल मन के मनमानी अऊ शासन के चुप्पी
छत्तीसगढ़िया क्रान्ति सेना के कार्यकर्ता मन ह कहिन कि:
- पूरा प्रदेश म निजी अस्पताल मन के मनमानी बाढ़ गे हे।
- गरीब मनखे मन ल इलाज बर भटकना पड़त हे अऊ अस्पताल मन ओकर खून चूसत हें।
- नेता, मंत्री अऊ अधिकारी मन ल जनता के तकलीफ ले कोनो सरोकार नई हे, काबर कि ओमन के इलाज त जनता के टैक्स के पैसा ले बड़े-बड़े अस्पताल म मुफ़्त म होथे।
संगठन के चेतावनी
क्रान्ति सेना ह साफ कह दीस हे कि जब तक पीड़ित परिवार ल न्याय नहीं मिलही अऊ अइसन लुटेरा अस्पताल मन ऊपर लगाम नहीं कसी जाही, तब तक लड़ाई जारी राही। "जोहार छत्तीसगढ़" के नारा के साथ संगठन ह गरीब मनखे मन के हक बर डटे के संकल्प दोहराइस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।