समाज म कुछ अइसन विरले मनखे घलो होथें, जे मन अपन काम अउ लगन ले सिरिफ अपन पहिचान नइ बनावय, बल्कि पूरा समाज बर प्ररेणा बन जथे। अइसने एक मेहनती अउ बहुमुखी प्रतिभा के धनी हें किरण प्रकाश साहू। अभी वर्तमान में शासकीय हाई स्कूल कोलर (अभनपुर) में गणित के व्याख्याता के पद म सेवा देवत किरण प्रकाश साहू के जिनगी शिक्षा, कला, खेल अउ समाज सेवा के एक अनूठा संगम आय।
बड़े सम्मान: दाऊ राम चंद्र देशमुख लोक कला एवं संगीत रत्न अवार्ड 2026
हाल ही में किरण प्रकाश साहू जी के सफल जिनगी में एक नवा सुग्घर अध्याय जुड़ गे हे। ओ मन ला समता साहित्य अकादमी, छत्तीसगढ़ कोती ले 'दाऊ रामचंद्र देशमुख लोक कला एवं संगीत रत्न अवार्ड 2026' ले नवाजे गे हे। ये बड़े सम्मान ओ मन ला अकादमी के राष्ट्रीय अध्यक्ष डॉ. डी. एस. तांडेकर अउ एडिशनल कमिश्नर श्री एस. एल. जांगड़े जी के हाथ ले प्रदान करे गीस। लोक कला अउ संगीत के क्षेत्र में साहू जी के जो विशेष योगदान हे, ओखर बर ये सम्मान ओ मन ला मिले हे। ये सम्मान सिरिफ ओखर कला के पहिचान नइ आय, बल्कि छत्तीसगढ़ के संस्कृति ला बचाय के ओखर प्रयास के घलो फल आय।
बचपन अउ पढ़ाई-लिखाई
18 दिसंबर 1975 ला धमतरी जिला के ग्राम मुजगहन में जनमे किरण जी ह बचपन ले ही शिक्षा के महत्ता ला समझ गे रहिन। ओखर पिता श्री रामकृष्ण साहू अउ माता श्रीमती बासन साहू के संस्कार मन ह ओ मन ला हमेशा लोक-कल्याण बर प्रेरित करिस। पढ़ाई-लिखाई में ओ मन ह गणित में एम.एससी. के डिग्री हासिल करिन अउ ओखर बाद शिक्षा जगत बर एम.एड. अउ शरीर-मन ला फिट रखे बर योग में पी.जी. डिप्लोमा घलो करिन। ये पूरा सफर में ओखर धरम-पत्नी श्रीमती ज्योति साहू के हमेशा साथ अउ सहयोग मिलत रहिस।
पढ़ाय के नवा तरीका: गणित ला बनाइन आसान
14 अगस्त 2008 ले शिक्षा के सेवा में आय के बाद किरण जी ह पुराना तरीका ला छोड़के नवा अउ आधुनिक तरीका ला अपनाइन। 'मोबाइल टीचिंग' के माध्यम ले ओ मन ह गणित जइसन कठिन विषय ला लइका मन बर खेल बना दीन। ओखर मेहनत के फल हे कि पिछला कुछ साल में ओखर स्कूल के लइका मन गणित में 100 प्रतिशत अंक लाके रिकार्ड बनाइन हें। ओ मन लइका मन ला सिरिफ किताबी ज्ञान नइ देवंय, बल्कि मॉडल बनाय अउ कला उत्सव के माध्यम ले ओखर प्रतिभा ला घलो निखारथें।
तबला वादन अउ सांस्कृतिक प्रेम
किरण जी सिरिफ एक शिक्षक ही नइ हें, बल्कि एक उच्च कोटि के तबला वादक घलो हें। ओ मन ह जिला, ब्लॉक अउ संकुल स्तर में तबला वादन में कई बार प्रथम स्थान पाइन हें। ओ मन ह नवा पीढ़ी ला घलो ये कला ले जोड़िन हे। ओखर मार्गदर्शन में गाँव-देहात के लइका मन आकाशवाणी अउ दूरदर्शन जइसन बड़े मंच में अपन कला दिखा चुके हें। 'लईका मड़ई' अउ 'युवा उत्सव' जइसन कार्यक्रम में ओखर सक्रियता छत्तीसगढ़ी संस्कृति बर ओखर मया ला देखाथे।
राष्ट्रीय खिलाड़ी अउ योग मास्टर ट्रेनर
"स्वस्थ तन में ही स्वस्थ मन रहिथे", ए बात ला किरण जी ह सच करके देखाय हें। एक खिलाड़ी के रूप में ओ मन ह साल 2017 में नेशनल मास्टर एथलेटिक्स (200 मीटर दौड़) में रजत पदक (Silver Medal) जीतके छत्तीसगढ़ के मान बढ़ाइन। एक योग मास्टर ट्रेनर के रूप में ओ मन ह सरकारी शिक्षक मन ला ट्रेनिंग देथें अउ NCERT कोती ले सुकमा जइसन दुरिहा इलाका में घलो सेवा दे चुके हें।
समाज सेवा अउ पर्यावरण के चिंता
समाज ला एक सूत्र में पिरोय बर ओ मन ह मुख्यमंत्री कन्या विवाह योजना अउ अलग-अलग समाज (साहू, मुस्लिम, क्रिश्चियन) के सामूहिक बिहाव में बढ़-चढ़के हिस्सा लेथें। पर्यावरण ला बचाय बर घलो ओ मन ह गजब काम करत हें। 'ग्रीन आर्मी ऑफ रायपुर' अउ स्कूल कोती ले मिले 'ग्रीन टीचर सम्मान' ओखर पौधा लगाय अउ जल संरक्षण के काम के पहिचान आय। गायत्री परिवार ले जुड़के ओ मन ह एक संस्कारी समाज बनाय बर दिन-रात जुटे हें।
आखिरी बात
आदर्श शिक्षक पुरस्कार (2018), नवाचार सम्मान अउ अब दाऊ राम चंद्र देशमुख लोक कला एवं संगीत रत्न अवार्ड 2026 ले सम्मानित श्री किरण प्रकाश साहू जी आज के युवा मन अउ शिक्षक मन बर एक प्रेरणा के दीया (मशाल) आयं। ओखर जिनगी ह हम ला सिखाथे कि यदि प्रतिभा के साथ मेहरत अउ सेवा के भाव जुड़ जावय, त सफलता के सिढ़ी ला आसानी ले चढ़े जा सकथे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।