छत्तीसगढ़ संस्कृति विभाग छात्रवृत्ति 2026-27: कलाकार मन बर बड़ मौका, कइसे भरव फॉर्म अउ का-का हे नियम?

रायपुर | छत्तीसगढ़ के माटी ह कला अउ संस्कृति ले सराबोर हे। इहां के लोक गीत, नृत्य अउ पारंपरिक वाद्य यंत्र मन के गूंज पूरा दुनिया म हे। फेर, कतको अइसन होनहार युवा कलाकार हें जेन मन आर्थिक तंगी के सेती अपन प्रतिभा ल निखार नइ पावत हें। अइसन कलाकार मन के हाथ थामे बर छत्तीसगढ़ संस्कृति विभाग ह 'अर्थाभावग्रस्त होनहार युवा कलाकार छात्रवृत्ति योजना 2026-27' के सुरुआत करे हे।

एकर बर आवेदन आमंत्रित करे गे हे। यदि आप घलो एक कलाकार हव अउ आगू बढ़ना चाहथव, तो ये लेख ल पूरा पढ़व।

छात्रवृत्ति योजना के मुख्य उद्देश्य

राज्य सरकार के ये योजना के पीछे असल मकसद छत्तीसगढ़ के लोक अउ जनजातीय कला ल सहेज के रखना हे। आर्थिक अभाव कतको प्रतिभा के रद्दा म बाधा बनथे, ओला दूर करना अउ युवा मन ल कला के क्षेत्र म उच्च शिक्षा अउ प्रशिक्षण बर प्रोत्साहित करना ही ए योजना के लक्ष्य आय।

ये विधा (Categories) मन म मिलही छात्रवृत्ति

संस्कृति विभाग ह कतको प्रकार के कला मन ल एमा सामिल करे हे, जेकर सूची इहां हे:

1. लोक एवं जनजातीय कला

एमा छत्तीसगढ़ के पारंपरिक नृत्य अउ गायन सामिल हे:

• नृत्य-गीत: पंडवानी, भरथरी, ददरिया, करमा, सुवा, राउत नाचा, पंथी।

• जनजातीय परंपरा: गोंडी गायन-वादन, पारंपरिक जनजातीय खेल अउ वाद्य यंत्र।

2. शास्त्रीय संगीत अउ नृत्य

• संगीत: हिंदुस्तानी अउ कर्नाटक शैली (गायन अउ वादन)।

• नृत्य: भरतनाट्यम, कथक, कुचिपुड़ी, मोहिनीअट्टम, ओडिसी, मणिपुरी, कथकली।

3. रंगमंच अउ सुगम संगीत

• नाटक: हिंदी अउ छत्तीसगढ़ी नाटक के संग जनजातीय नाट्य विधा।

• गायन: ठुमरी, दादरा, टप्पा, भजन, ग़ज़ल अउ कव्वाली।

4. दृश्य कला (Visual Arts)

• पेंटिंग, फोटोग्राफी, मूर्तिकला, ग्राफिक्स, मृद्भांड (सेरामिक्स) अउ लोक-जनजातीय चित्रांकन।

किरपा करके धियान देव: पात्रता अउ नियम (Eligibility)

योजना के लाभ लेय बर आप मन ल ये शर्त मन ल पूरा करना पड़ही:

1. मूल निवासी: आवेदक ह छत्तीसगढ़ के स्थायी निवासी होना चाही।

2. चिनहारी पोर्टल: आवेदक के पंजीयन 'चिनहारी पोर्टल' म होना अनिवार्य हे।

3. उम्र सीमा: आवेदक के उम्र 15 साल ले 30 साल के बीच होना चाही (1 जनवरी 2026 के स्थिति म)।

4. आय सीमा: आवेदक या ओकर माता-पिता के कुल सालाना आय 72,000 रुपिया ले जादा नई होना चाही।

छात्रवृत्ति के राशि (Scholarship Amount)

चयनित कलाकार मन ल उंकर विधा अउ योग्यता के आधार म हर महीना 5,000 रुपिया ले 10,000 रुपिया तक के छात्रवृत्ति दी जाही। ये राशि सीधा आपके बैंक खाता म DBT (Direct Benefit Transfer) के माध्यम ले भेजी जाही।

कइसे अउ किहां जमा करना हे आवेदन?

• आवेदन के प्रारूप: आवेदन केवल विभाग डाहर ले तय करे गे प्रारूप (Format) म ही स्वीकार करे जाही।

• जरूरी दस्तावेज: आय प्रमाण पत्र, निवास प्रमाण पत्र, उम्र के प्रमाण, चिनहारी पोर्टल के पंजीयन कॉपी अउ कला क्षेत्र म उपलब्धि के प्रमाण पत्र।

• भेजे के रद्दा: भरे गे फॉर्म ल 20 मार्च 2026 तक 'पंजीकृत डाक' (Registered Post) ले संस्कृति विभाग के कार्यालय म भेजना हे।

• लिफाफा म लिखना हे: लिफाफा के ऊपर बड़े अच्छर म लिखना अनिवार्य हे— "अर्थाभावग्रस्त होनहार युवा कलाकारों/छात्रों के लिए छात्रवृत्ति योजना 2026-27"।