ये मउका म मुख्यमंत्री ह बिलासपुर जिला ल 263.17 करोड़ के लागत वाले 89 विकास कार्य मन के सौगात घलो दीस, जेकर से जिला म विकास के नवा रफ्तार आही।
होरी ले पहिली किसान मन के घर आई खुसी
सम्मेलन ल संबोधित करत मुख्यमंत्री श्री साय ह कहिन कि- "आज के दिन हमर किसान भाई मन के मेहनत अउ पसीना के सम्मान के दिन आय। हम चाहत रहेन कि किसान मन होरी के तिहार ल धूम-धाम ले अउ बिना कोनो आर्थिक चिंता के मना सकं, इही सेती होरी के पहिली ये राशि भेजे जावत हे।"
कार्यक्रम म मुख्यमंत्री अउ अतिथि मन के सम्मान खुमरी अउ नांगर भेंट करके करे गीस। ए बखत ‘कृषक उन्नति योजना के वरदान, छत्तीसगढ़ के हर किसान धनवान’ थीम ऊपर आधारित एक सुघ्घर वीडियो के विमोचन घलो करे गीस।
किसान हितैषी सरकार के बड़े फैसला
मुख्यमंत्री ह बताइन कि प्रदेश म किसान मन ल धान के सर्वाधिक कीमत देय के व्यवस्था करे गे हे, जेन अउ कतहूं नई हे। ए पइत किसान मन ल बारदाना (बोरा) के कोनो समस्या नई होइस अउ पैसा घलो समय म खाता म पहुंचत हे। सरकार ह शून्य प्रतिशत ब्याज दर म ऋण के सुविधा दे हे, जेकर लाभ आज लाखों किसान उठावत हें।
ओमन आगू कहिन कि सरकार सिरिफ धान नई, बल्कि भूमिहीन कृषि मजदूर मन के घलो चिंता करत हे अउ उंकर खाता म घलो राशि भेजे जावत हे। खाद म सब्सिडी अउ सिंचाई सुविधा के विस्तार ले छत्तीसगढ़ के खेती-किसानी ल लाभप्रद बनाए जाही।
समाज अउ क्षेत्र बर बड़े घोषणा मन
मुख्यमंत्री श्री साय ह जनहित म कतको महत्वपूर्ण घोषणा करिन:
सतनामी समाज अउ आदिवासी समाज (पत्थरखान): दूनों समाज के सामुदायिक भवन बर 50-50 लाख रुपिया देय के घोषणा।
स्वास्थ्य: चकरभाटा के प्राथमिक स्वास्थ्य केंद्र ल 'सामुदायिक स्वास्थ्य केंद्र' (CHC) म बदले जाही।
शिक्षा: मंगला के माध्यमिक शाला ल अब 'हाई स्कूल' बनाय जाही।
खेल: रहंगी के खेल मैदान म बाउंड्रीवॉल अउ स्टेज के निर्माण होही।
2026 तक नक्सलवाद के खात्मा के संकल्प
बस्तर के स्थिति ऊपर गोठियावत मुख्यमंत्री ह कहिन कि- "नक्सलवाद अब बस्तर ले समाप्ति के कगार म हे। प्रधानमंत्री नरेंद्र मोदी अउ गृहमंत्री अमित शाह के संकल्प के मुताबिक मार्च 2026 तक छत्तीसगढ़ ले नक्सलवाद पूरी तरह खत्म हो जाही।"
किसान ले सीधा संवाद: "36 हजार मिले हे, अब होरी सुघ्घर मनही"
मुख्यमंत्री ह वर्चुअल माध्यम ले प्रदेश के किसान मन ले बात घलो करिन:
बसंती कश्यप (जगदलपुर): बताइन कि 36 हजार रुपिया मिले हे, अब होरी सुघ्घर मनाबो।
सुखन साय (पहाड़ी कोरवा, कोरबा): 73 क्विंटल धान बेचे रिहिन, जेकर 53 हजार रुपिया अंतर के राशि मिलीस। ए पैसा ले ओमन घर बनवाहीं।
समर्थ सिंह (जांजगीर): 1.41 लाख रुपिया मिले बर मुख्यमंत्री ल धन्यवाद दीन।
कृषि मंत्री अउ दिग्गज नेता मन के विचार
कृषि मंत्री राम विचार नेताम ह कहिन कि ये ऐतिहासिक क्षण हे कि मुख्यमंत्री खुद किसान मन के बीच आके राशि डारत हें। ओमन किसान मन ल दलहन-तिलहन अउ जैविक खेती डाहर घलो बढ़े बर प्रोत्साहित करिन। पूर्व विधानसभा अध्यक्ष धरमलाल कौशिक ह कहिन कि ये सरकार अन्नदाता मन के पसीना के मोल समझथे।
कार्यक्रम म विधायक अमर अग्रवाल, सुशांत शुक्ला, मुख्यमंत्री के सचिव पी. दयानंद अउ जिला प्रशासन के कतको अधिकारी अउ हजारों के संख्या म किसान भाई मन उपस्थित रहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।