रायपुर। छत्तीसगढ़ ला सिनेमा के नवा हब बनाय बर चित्रोत्पला फिल्म सिटी के उद्घाटन समारोह ह अब विवाद म फंस गे हावय। एक कोती सरकार ह एला 150 करोड़ के बड़ छलांग बतावत हे, त दूसर कोती छत्तीसगढ़ी सिनेमा के दिग्गज कलाकार मन ह ए आयोजन के तरीका ऊपर कड़ा विरोध जताय हें। विवाद के सबले बड़े कारन ये हे कि मंच म हमर राज्य के कलाकार मन ला जगा नई मिलिस अउ बाहिर के सितारा मन ला आगू रखे गिस।
"का हमन काबिल नई हवन?"– अभिनेत्री के छलकिस पीरा
छत्तीसगढ़ी फिल्म इंडस्ट्री के नामचीन अभिनेत्री ह सोशल मीडिया म अपन दरद साझा करत सीधा सवाल पूछे हे। ओ मन कहिन— "छत्तीसगढ़ के सिनेमा के उद्घाटन ला बाहिर के मनखे करथें, त अपन कलाकार मन ला बुलाय बर शरम आथे का? या फेर हमर छत्तीसगढ़िया कलाकार मन काबिल नई हवंय?" अभिनेत्री ह भावुक होके कहिस कि 150 करोड़ के सपना त साकार होवत हे, फेर ओ मंच मं माटी ले जुड़े कलाकार मन के कोई अस्तित्व नई दिखत हे। का छत्तीसगढ़ के लोगन मन सिरिफ ताली बजाय बर हें? ए पोस्ट ह सोशल मीडिया म आगी सही पसर गे हे अउ जम्मो कलाकार मन एकर समर्थन करत हें।
अफसरशाही अउ राजनीति के बीच दबिस कलाकार मन के हक़
फिल्म इंडस्ट्री ले जुड़े फिल्ममेकर्स अउ कलाकार मन के आरोप हे कि जे मन ह छत्तीसगढ़ी सिनेमा ला जीरो ले खड़ा करिन, आज उहि मन ला अंधियारी मं राख दिय गे हे। कलाकार मन के कहना हे कि:
- अनदेखी: फिल्म सिटी के रूपरेखा बनाय म स्थानीय कलाकार मन ले कोई सलाह-मशविरा नई करे गिस।
- अस्मिता के सवाल: छत्तीसगढ़िया संस्कृति के नांव म बनत फिल्म सिटी के उद्घाटन म छत्तीसगढ़ी चेहरा मन के गायब होना, हमर पहिचान के अपमान आय।
- बाहिरी चकाचौंध: आरोप हे कि अफसर मन अउ इवेंट कंपनी मन के चक्कर म हमर माटी के कलाकार मन ला "भीड़" समझ के छोड़ दिय गे हे।
सोशल मीडिया मं छिड़िस मुहिम
ए अपमान के खिलाफ अब जम्मो छत्तीसगढ़िया कलाकार अउ परसंशक मन एकजुट होवत हें। सोशल मीडिया म लोगन मन पूछत हें कि अगर फिल्म सिटी हमर बर बनत हे, त हमर कलाकार मन ला मंच म जगा काबर नई मिलिस? लोगन मन के कहना हे कि हमन ला निवेश ले कोई दिक्कत नई हे, फेर हमर स्वाभिमान ला कुचले के कोसिस झन करे जाय।
सबले बड़े सवाल
आज छत्तीसगढ़ी सिनेमा जगत के मन म बस एके सवाल हे- का 150 करोड़ के ये चकाचौंध म हमर माटी के कला अउ कलाकार मन के कोनो कीमत नई हे? का 'फिल्म सिटी' सिरिफ बाहिर के मनखे मन बर बनत हे?
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।