मुंबई/रायपुर। सनी देओल अउ वरुण धवन के अभिनय ले सजे युद्ध प्रधान फिल्म ‘बॉर्डर 2’ ह बॉक्स ऑफिस म नवा कीर्तिमान रचत हे। ये फिल्म ह रिलीज के सिरिफ चार दिन म दुनिया भर म 250 करोड़ रुपिया ले जादा के कमाई कर डारे हे। गणतंत्र दिवस के राष्ट्रीय परब म फिल्म ला भारी फायदा मिलीस, जेखर ले एकर कमाई म जबरदस्त उछाल देखे बर मिलीस।
कमाई के नवा आँकड़ा के जानकारी के मुताबिक, 26 जनवरी यानी रिलीज के चौथे दिन ‘बॉर्डर 2’ ह घरेलू बॉक्स ऑफिस मा 59 करोड़ रुपिया के कारोबार करिस। हिंदी भासा म फिल्म ला देखे बर थियेटर मन म 64.27% भीड़ दर्ज करे गीस। येखर साथ ही भारत म फिल्म ह अब तक कुल 180 करोड़ रुपिया (नेट) अउ 212.5 करोड़ रुपिया (ग्रॉस) के कमाई कर डारे हे।
विदेस म घलो डंका सिर्फ अपन देस मा नई, बल्कि सात समंदर पार घलो फिल्म के जलवा बरकरार हे। अंतरराष्ट्रीय बजार म फिल्म ह अब तक करीब 4.3 मिलियन डॉलर बटोर लीस हे। सबो ला मिला के चार दिन म फिल्म के वर्ल्डवाइड कलेक्शन 251 करोड़ रुपिया तक पहुँच गे हे। नामी फिल्म समीक्षक तरण आदर्श के मुताबिक फिल्म के आधिकारिक नेट बॉक्स ऑफिस के आँकड़ा 193.48 करोड़ रुपिया हो गे हे।
बड़े फिल्म मन के रिकॉर्ड टूटीस सबले बड़े बात ये हे कि ‘बॉर्डर 2’ ह सलमान खान के ‘सिकंदर’ अउ अजय देवगन के ‘रेड 2’ जइसन बड़े फिल्म मन के लाइफटाइम कलेक्शन ला सिरिफ चार दिन मा पाछू छोड़ दीस हे। अब ये फिल्म ह 300 करोड़ के क्लब मा शामिल होय के एकदम नगिच हे अउ उम्मीद हे कि बुधवार तक ये आँकड़ा घलो पार हो जाही।
विरासत के जीत अनुराग सिंह के निर्देशन मा बनी ये फिल्म ह साल 1997 मा आई जेपी दत्ता के कालजयी फिल्म ‘बॉर्डर’ के सीक्वल आय। भूषण कुमार, जेपी दत्ता अउ निधि दत्ता डाहर ले प्रोड्यूस करे गे ये फिल्म ह साल 2026 के सबले बड़े हिट साबित होवत हे। सुरु मा कुछ जगा दिक्कत आईस, फेर फिल्म के लोकप्रियता ह सबो बाधा ला पार कर डारिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।