रायपुर: रायपुर जिला लोक खेल एसोसिएशन डहर ले ग्राम कांदुल म ' लोक खेल जलसा 2026' के बड़का आयोजन होइस। ए कार्यक्रम म रायपुर ग्रामीण के विधायक मोतीलाल साहू मुख्य अतिथि के रूप म सामिल होइन। कार्यक्रम के अध्यक्षता कांदुल सरपंच तिलेश्वरी धुरंधर ह करिन। ए मौका म रविंद्र साहू, जितेन्द्र धुरंधर, खेमू यादव अउ ललित साहू घलो विशेष अतिथि के रूप म मौजूद रहिन। एसोसिएशन के अध्यक्ष जितेन्द्र साहू अउ संयोजक चंद्रशेखर चकोर ह बताइन कि हमर पुरखा मन के खेल ला बचाना अउ आज के पीढ़ी ला ओकर ले जोड़ना ही ए आयोजन के असली मकसद आय।
प्रतियोगिता म गांव-गांव के खिलाड़ी मन अपन हुनर देखाइन। गिल्ली डंडा खेल म अभनपुर के बिरोदा गांव के दल ह बाजी मारिस अउ विजेता बनिस, त ऊंहे कांदुल के दल उपविजेता रहिस। गेड़ी दौड़ म दतरेंगा प्रथम अउ कांदुल द्वितीय स्थान प्राप्त करिन। फुगड़ी म राजू ह पहिला, मोहन पाल ह दूसरा अउ हेमंत सोनकर ह तीसरा नंबर म रहिन। ए आयोजन ला सफल बनाय म एसोसिएशन के उपाध्यक्ष छविराम साहू, कोषाध्यक्ष बालमुकुंद धनकर, सचिव ईश्वरी ध्रुव अउ संयुक्त सचिव खेलावन निषाद दिन-रात जुटे रहिन।
पुरस्कार वितरण के बेरा गांव के सियान मन ह अपन हाथ ले विजेता मन ला इनाम दीन। ए मौका म कार्यकारिणी सदस्य लीलाराम साहू, खेमू यादव अउ सदस्य मन म राजेंद्र वर्मा, कृष्णकांत, महेश यादव, भोला यादव, योगेश साहू, मेघराज सपहा, पंकज निषाद अउ पंचराम यादव मौजूद रहिन। संग म घनश्याम वर्मा, परमेश्वर कोसे, खिलावन निषाद, भेवसिंग धीवर, मिथिलेश निषाद, यतीश चंदोर, शिव चंद्राकर, जयंत साहू अउ गोविंद धनगर घलो उपस्थित रहिन अउ खिलाड़ी मन के उत्साह बढ़ाइन। विधायक मोतीलाल साहू ह कहिन कि हमर छत्तीसगढ़ी संस्कृति अउ लोक खेल मन के संवर्धन बर अइसन आयोजन बहुत जरूरी हे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।