नक्सलवाद के खतम होए ले बस्तर म मूलभूत सुविधा के तेज ले विकास : मुख्यमंत्री विष्णुदेव साय

मुख्यमंत्री विष्णु देव साय ह कहिन कि बस्तर अंचल के विकास राज्य सरकार के सबले पहिली प्राथमिकता म सामिल हे। नक्सलवाद ल जड़ ले उखाड़े के संग-संग बस्तर म मूलभूत सुविधा के विकास तेज गति ले करे जात हे अऊ बस्तर अब विकास के डहर म ससक्त गति ले आगू बढ़त हे। मुख्यमंत्री साय जगदलपुर म आयोजित बस्तर ओलम्पिक 2025 के समापन समारोह ल संबोधित करत रिहिन।

मुख्यमंत्री साय ह कहिन कि छत्तीसगढ़ एक समृद्ध राज्य हे, फेर माओवाद के समस्या सुरुआत ले ही राज्य के विकास म एक बड़े बाधा रिहिस हे। उमन कहिन कि प्रधानमंत्री नरेंद्र मोदी के अगुवाई अऊ केंद्रीय गृह मंत्री अमित शाह के कठोर संकल्प के कारन अब माओवाद के अंत बर साफ समय-सीमा तय करे गे हे। नियद नेल्ला नार योजना के घेरा ल 5 किलोमीटर ले बढ़ाके 10 किलोमीटर तक फैलाय गे हे, जेकर माध्यम ले 403 गाँव म बिजली, पीये के पानी, स्वास्थ्य, शिक्षा समेत आन मूलभूत सुविधा तेजी ले पहुँचे लगे हे।

मुख्यमंत्री साय ह आगू कहिन कि माओवाद के कारन बंद परे स्कूल अब फेर ले खुलत हें। रद्दा मन के ज्यादा नेटवर्क बनाके भीतरी इलाका मन ल आवागमन के सुविधा ले जोड़े जात हे। माओवाद ले मुक्त गाँव मन म जनहितकारी योजना मन के पूरा सेचुरेशन करे जात हे। ए सब सकारात्मक कोसिस मन के नतीजा म विकास के प्रति आमजन के बिसवास लगातार बढ़त हे। मुख्यमंत्री साय ह बस्तर ओलम्पिक म भाग लेवइया सबो खिलाडी मन के उत्साह बढ़ाईस अऊ ओ मन ल बधाई दीस, संग ही आवइया बछर अऊ ज्यादा बढ़िया प्रदर्शन बर सुभकामना घलो भेजीस।

ए मउका म विधानसभा अध्यक्ष डॉ. रमन सिंह ह कहिन कि बस्तर देश म एक नवा इतिहास बनावत हे। उमन बिसवास जताइन कि 31 मार्च 2026 तक नक्सलवाद पूरा तरीका ले खतम हो जाही अऊ बस्तर फेर ले खुसहाल बनही। कार्यक्रम ल उपमुख्यमंत्री द्वय अरुण साव अऊ विजय शर्मा ह घलो संबोधित करिन अऊ बस्तर ओलम्पिक के सफल आयोजन बर खिलाडी मन ल बधाई दीस। विधायक जगदलपुर किरण देव ह सुवागत भासन म सबो पहुना अऊ खिलाडी मन के आत्मीय सुवागत करिन। समारोह के आखिरी म सांसद महेश कश्यप ह आभार व्यक्त करिन।

ए मउका म केबिनेट मंत्री केदार कश्यप, सांसद भोजराज नाग, बस्तर क्षेत्र आदिवासी विकास प्राधिकरण के उपाध्यक्ष लता उसेंडी, विधायक मन म विक्रम उसेंडी, नीलकंठ टेकाम, विनायक गोयल, आशाराम नेताम, छत्तीसगढ़ बेवरेज कॉर्पोरेशन के अध्यक्ष श्रीनिवास राव मद्दी, छत्तीसगढ़ अनुसूचित जनजाति आयोग के अध्यक्ष रूपसिंह मंडावी, छत्तीसगढ़ राज्य युवा आयोग के अध्यक्ष विश्व विजय सिंह तोमर, नगर निगम जगदलपुर के महापौर संजय पांडे समेत कतको जनप्रतिनिधि अऊ भारी संख्या म खेलप्रेमी अऊ गणमान्य नागरिक उपस्थित रिहिन।

छत्तीसगढ़ी अनुवादक- जयंत साहू

संपादक- अंजोर छत्तीसगढ़ी समाचार