बारनवापारा वन्यजीव अभयारण्य म होही 'सिटिज़न साइंस बर्ड सर्वे 2026'
सिटिज़न साइंस बर्ड सर्वे (नागरिक विज्ञान पक्षी सर्वेक्षण) एक अइसन कार्यक्रम आय, जेमा आम मनखे बिना कोनो वैज्ञानिक अनुभव के, चिरई मन ला देखके ओ मन के डेटा इकट्ठा करथें। एखर ले वैज्ञानिक मन ला चिरई मन के संख्या, प्रवास अउ मौसम के बदलाव (जइसे जलवायु परिवर्तन, प्रदूषण) के असर ला समझे म मदद मिलथे। ए डेटा चिरई मन के बचाव बर बहुत जरूरी हे।
वन अउ जलवायु परिवर्तन मंत्री केदार कश्यप के निर्देश अउ वनमंडलाधिकारी धम्मशील गणवीर के मार्गदर्शन म बारनवापारा वन्यजीव अभयारण्य म सिटिज़न साइंस बर्ड सर्वे 2026 के आयोजन 16 ले 18 जनवरी 2026 तक करे जाही।
ए सर्वे के मुख्य उद्देश्य ह छत्तीसगढ़ के धनी चिरई-विविधता के वैज्ञानिक दस्तावेजीकरण करना, नागरिक वैज्ञानिक मन के भागीदारी ला बढ़ाना अउ चिरकाल तक संरक्षण के काम ला मजबूत करना हे। बारनवापारा अभयारण्य, जेमा सुरक्षित प्रकृति, घासभूमि अउ जंगल के मिश्रित नजारा हे, अइसन अध्ययन बर बड़का उपयुक्त माने जाथे।
12 राज्य मन के भागीदार मन म उत्साह
ए कार्यक्रम ला लेके प्रतिभागी मन म गजब उत्साह देखे बर मिलत हे। अब तक 135 आवेदन मिल गे हें, जेमा छत्तीसगढ़ समेत देस के 12 राज- आंध्र प्रदेश, बिहार, दिल्ली, गुजरात, कर्नाटक, केरल, मध्यप्रदेश, महाराष्ट्र, ओडिशा, तेलंगाना, उत्तर प्रदेश अउ पश्चिम बंगाल के प्रतिभागी मन ह पंजीयन कराए हें। ए बढिय़ा सहभागिता ह छत्तीसगढ़ के जीव-विविधता के प्रति राष्ट्रीय स्तर म बाढ़त रुचि ला देखाथे अउ बारनवापारा अभयारण्य ला एक महत्वपूर्ण संरक्षण जगा के रूप म स्थापित करथे।
पंजीयन के आखरी तारीख 15 दिसंबर
सर्वे बर पंजीयन के आखरी तारीख 15 दिसंबर 2025 रखे गे हे। जे मन इच्छुक हें, ओ मन ए लिंक: https://bit.ly/48ebh9m या फ्लायर म दे गे QR कोड के माध्यम ले आवेदन कर सकत हें।
ए आयोजन 'Birds & Wildlife of Chhattisgarh' के सहयोग अउ eBird के तकनीकी मदद ले करे जात हे, जेकर ले प्रतिभागी मन द्वारा इकट्ठा करे गे जानकारी वैश्विक डेटाबेस (Global Database) म सामिल होही।
छत्तीसगढ़ी अनुवादक- जयंत साहू
संपादक- अंजोर छत्तीसगढ़ी समाचार
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।