उप मुख्यमंत्री अरुण साव नवा रायपुर म नवा विधानसभा भवन के लोकार्पण तियारी के करिन निरीक्षण

उप मुख्यमंत्री अउ लोक निर्माण मंत्री अरुण साव नवा रायपुर म बनत नवा छत्तीसगढ़ विधानसभा भवन के लोकार्पण तियारी के निरीक्षण करिन। ए दौरान वन अउ जलवायु परिवर्तन मंत्री केदार कश्यप घलो वोकर संग रहिन।

जानबा होवय के प्रधानमंत्री नरेन्द्र मोदी 1 नवम्बर के राज्योत्सव के मउका म नवा विधानसभा भवन के लोकार्पण करहीं। ए कार्यक्रम म प्रधानमंत्री मोदी ह विधायक मन अउ आमंत्रित अतिथी मन ला संबोधित घलो करहीं।

उप मुख्यमंत्री साव नवा विधानसभा परिसर म पूर्व प्रधानमंत्री स्वर्गीय अटल बिहारी बाजपेयी के मूर्ति अनावरण स्थल, विधानसभा सदन अउ मंचीय कार्यक्रम के स्थल के जायजा लेके अधिकारी मन ला आवश्यक दिशा-निर्देश दिस। नवा रायपुर के सेक्टर–19 म मंत्रालय (महानदी भवन) अउ विभागाध्यक्ष कार्यालय (इंद्रावती भवन) के पीछे 51 एकड़ के परिसर म नवा विधानसभा भवन बनाय गे हे।

निरीक्षण के बाद उप मुख्यमंत्री साव कहिन– “1 नवम्बर के दिन छत्तीसगढ़ बर ऐतिहासिक होही। प्रधानमंत्री नरेन्द्र मोदी हमर नवा विधानसभा भवन ला जनता बर समर्पित करहीं। सन 2000 म राज्य बनाय गे रहिस अउ राजकुमार कॉलेज ले अस्थायी विधानसभा चले रहिस। अब 25 बछर बाद रजत जयंती वर्ष म छत्तीसगढ़ ला अपन खुद के भव्य अउ आधुनिक विधानसभा भवन मिलत हे। ए भवन सिरिफ सुंदर इमारत नइ हे, ए हमर समृद्ध संस्कृति, परंपरा अउ गौरव के प्रतीक आय।”

उप मुख्यमंत्री साव बताइन के नवा विधानसभा भवन ला वर्तमान अउ भविष्य के जरूरत के हिसाब ले बनाय गे हे। ए आधुनिक, सर्वसुविधायुक्त अउ सुसज्जित भवन म विधानसभा सदन 200 सदस्य के क्षमता तक बढ़ाय जा सकत हे। भविष्य म पेपरलेस विधानसभा चले, एकर बर जरूरी तकनीकी व्यवस्था घलो रखे गे हे।