अमन मूव्ही मार्क के बैनर तरि बने छत्तीसगढ़ी फिलिम मया देदे मयारू 2 के सुटिंग पूरा होगे हावय। ये फिलिम के निर्माता अलक राय हें, अउ निर्देशन प्रेम चंद्राकर अउ सुप्रेंद्र साहू ह करे हें। कहानी, मया अउ छत्तीसगढ़ी परंपरा के रंग ला एक संग जोड़त ये फिलिम मनखे के हिरदे ला छू लेही।
छत्तीसगढ़ी सिनेमा के संगी मन बर एक नवा बड़का खुशखबरी आइस के सुपरहिट फिलिम मया देदे मयारू के दूसर कड़ी “मया देदे मयारू 2” के सुटिंग अब पूरा होगे हे। अब ये फिलिम अब बड़े परदा म दिखे बर तइयार हावय।
फिलिम म अहम किरदार म नजर आही मन कुरैशी, लक्षित झांझी, इशिका यादव, दीक्षा जायसवाल, अंजली चौहान, सुरेश गोंडाले, क्रांति दीक्षित, सोमनाथ साहू, डॉ. अजय सहाय, पूनम गोस्वामी, विनय अंबस्ट के संग छॉलीवुड के केउ दिग्गज कलाकार।
मिले आरो के मुताबिक येमा सब्बो कलाकार मन अपन-अपन अंदाज म मया, हंसी अउ अपनापन के कहानी ला जीवंत बनाये हाबे। दर्शक मन खातिर संभावित 10 अप्रैल 2026 के तारीख बताये गे हावय, माने ये फिलिम 2026 म सिनेमाघर म देखे ला मिलही।
फिलिम के कहानी-पटकथा-गीत-संगीत प्रेम चंद्राकर अउ भूपेन्द्र साहू के हावय। संवाद लिखे हे भूप्रेंद्र साहू ह। डीओपी दिलीप राय ह करे हें। फिलिम के कलाकार मन कहिथें के सुटिंग के अनुभव बहुत मजेदार राहय, अउ अब ओमन उम्मीद करत हें के दर्शक मन पहिली भाग जइसने ये दूसर भाग ला घलो भरपूर मया देवें। बहरहाल हमरों कोति ले पूरा टीम ल सुभकामना।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।