ए साल के देवारी छत्तीसगढ़ के हजारों परिवार बर कुछू अलगेच खुशी ले आइस। ये बछर ओ मन के घर म सिरिफ दीया के रोशनी नही, बलकी ‘अपन घर’ के सुख, गर्व अउ आत्म–सम्मान के उजाला फैलय वाला हे।
प्रधानमंत्री आवास योजना (ग्रामीण) ले रायगढ़ जिला एक ठन गजब उपलब्धि हासिल करिस। इहां 30 हजार ले जादा आवास के निर्माण पूरा होगे हे। मुख्यमंत्री विष्णुदेव साय के संकल्प अउ जिला प्रशासन के लगन ले ये सबो संभव होय हे। प्रदेश के वित्त मंत्री ओ.पी. चौधरी के विशेष पहल ले हितग्राही मन ला अपन घर के सपना पूरा होइस, अउ अब के देवारी म ओ मन के नवा आंगन म दीया जलही, खुशी चमकही।
मिशन मोड म दिखिस रायगढ़ के जज्बा
कलेक्टर मयंक चतुर्वेदी के नेत्तृत्व म रायगढ़ जिला पीएम आवास योजना ला सिरिफ सरकारी योजना नई, बलकी एक ठन “जन–अभियान” बना दिस। गांव–गांव टीम बनके काम होइस, हर हितग्राही के दिक्कत ला तुरते सुलझाय गीस। जिहां काम धीमा रहिस, ओहां समीक्षा बैठका रखके जिम्मेदार अमला उपर कार्रवाई होइस।
इही मेहनत के नतीजा हे कि रायगढ़ जिला आज प्रदेश म सबले आगू खड़ा हे। 5 हजार, 10 हजार, 15 हजार, 20 हजार ले 25 हजार आवास तक के सब्बो चरण म लक्ष्य सबले पहिले पूरा कर लिहिस।
आवास योजना ले बढ़िस रोजगार, सशक्त होइस महिलामन
प्रधानमंत्री आवास योजना सिरिफ छत नई देहे ये ले गांव के अर्थव्यवस्था ला भी नई दिशा मिलिस हे।
महिला स्व–सहायता समूह मन ला सेटरिंग प्लेट बनाय अउ आपूर्ति काम म जोड़े गीस, जेन ले ओ मन ला आमदनी अउ आत्मनिर्भरता दूनो मिलिस। युवा मन ला राजमिस्त्री के रूप म सिखाय गीस अउ निर्माण काम म सामिल कराय गीस। एले गांव म रोजगार बढ़िस, अउ मजदूर मन के मेहनत ला सम्मान मिलिस। रायगढ़ के कहानी अब ग्रामीण समृद्धि अउ महिला सशक्तिकरण के प्रेरक उदाहरण बन गे हे।
बिरहोर परिवार बर उजाला बनिस पीएम जनमन योजना
प्रधानमंत्री नरेंद्र मोदी के पहल पर चालू प्रधानमंत्री जनमन योजना के तहत रायगढ़ जिला म भी जबरदस्त प्रगति होइस। विशेष पिछड़ी जनजाति बिरहोर परिवार बर स्वीकृत 173 आवास म ले 150 आवास पूरा हो गे हवंय यानी 82 फीसदी लक्ष्य पूरा। बाकी काम अंतिम चरण म हे।
ए पक्के घर मन ले बिरहोर परिवार के जीवन म सिरिफ छत नई, बलकी सुरक्षा, जुड़ाव अउ आत्म–विश्वास के उजाला भर गे हे। ए साल ओ मन बर दीपावली सिरिफ दीया के परब नई, सम्मान के उत्सव बन गे हे।
रायगढ़ – प्रदेश के अगुवा जिला
कलेक्टर मयंक चतुर्वेदी कहिन कि प्रधानमंत्री आवास योजना (ग्रामीण) के क्रियान्वयन म रायगढ़ हर बार प्रदेश म आगू रहिस हे। ओमन कहिन “ए योजना सिरिफ घर नई देहे, बलकी हर गरीब परिवार के जीवन म स्थायित्व, गरिमा अउ आत्म–विश्वास देहे। अब ए घर मन म हर तिहार म हंसी, दीया के रोशनी अउ संतोष के मुस्कान गूंजही इही योजना के सच्ची सफलता हे।”
दीपावली के नवा बिहान, अपन घर के उजाला ले चमकीही
ए दीपावली सिरिफ दीया के परब नई, बल्कि सरकारी योजना के संवेदनशीलता अउ जनता के उम्मीद के संगम के उत्सव हे। ए 30 हजार ले जियादा घर के चमक म लुके हे — प्रशासन के निष्ठा, हितग्राही मन के मेहनत अउ ओ सपना के पूर्ति, जेन सपना हर गरीब परिवार अपन मन म देखे रहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।