आंगनबाड़ी म खेल-खेल म संवरत नान्‍हे लइका के भविस

छत्तीसगढ़ के आंगनबाड़ी केंद्र अब पोषण अउ देखभाल के संग-संग लइका मनके सर्वांगीण विकास के केंद्र बनत जात हावयं। महासमुंद जिला के शहरी सेक्टर-1 ले संजय नगर-2, दलदली रोड अउ विश्वकर्मा वार्ड के सक्षम आंगनबाड़ी केंद्र ए बदलाव के सजीव मिसाल हावयं। रंग-बिरंगी दीवार, शैक्षणिक चित्र, खेल-खेल म सीखे के तरीका अउ खिलखिलात लइका के उपस्थिति ह ये केन्द्र के छवि पूरा रकम ले बदल दीस।

सक्षम आंगनबाड़ी केंद्र बने बाल विकास अउ सामाजिक जागरूकता के मॉडल केंद्र

दीवार म उकेरी गे चित्रकारी अउ संदेश “जितनी अच्छा वजन के रेखा, ओतका अच्छा लइका देखा”, “लड़का-लड़की एक समान”  न सिरिफ बाल देखभाल के संदेश देत हावयं बल्कि समाज म समानता अउ स्वास्थ्य जागरूकता के प्रसार तको करत हावयं। इहां लइका के संग गर्भवती माता अउ किशोरी नोनी मन तको आने-आने योजना मन के माध्यम ले लाभान्वित होत हावयं।

सेक्टर पर्यवेक्षक श्रीमती शीला प्रधान के मुताबिक मुख्यमंत्री बाल संदर्भ योजना, प्रधानमंत्री मातृत्व वंदन योजना, नोनी सुरक्षा, महतारी वंदन योजना अउ सुकन्या समृद्धि योजना जइसे योजना मन के प्रभावी क्रियान्वयन ये केन्द्र म होवत हाबे। ये पहल ले महतारी मन अउ नोनी मन के स्वास्थ्य, पोषण अउ अधिकार के सुरक्षा सुनिश्चित करे जात हावय। केन्द्र म स्वच्छता अउ व्यवस्थापन म तको बिसेस धियान दे हावय। आरओ वाटर प्यूरीफायर, स्वच्छ किचन रूम, खेल सामान अउ खेलघर जइसे सुविधा लइका ल सुरक्षित अउ प्रोत्साहनकारी वातावरण देत हावयं। अर्ली चाइल्डहुड केयर के तहत लइका ल भाषा, गणित अउ व्यवहारिक ज्ञान के बुनियादी शिक्षा रोचक तरीका ले दे जात हावय।

आंगनबाड़ी कार्यकर्ता श्रीमती रूपा भारती अउ श्रीमती अंजू चंद्राकर बतावत हावयं के लइका के मुंह जुठरौनी संस्कार ले लेके किशोरी के स्वास्थ्य अउ स्वच्छता तक के खातिर बिसेस कार्यक्रम आयोजित करे  जात हावयं। महतारी समिति मन के सरलग बइठ महतारी मन के सहभागिता सुनिश्चित करत हावयं।

मुख्यमंत्री विष्णुदेव साय ह किहिन हावय के राज्य सरकार के लक्ष्य हावय के हर आंगनबाड़ी केंद्र लइका के समग्र विकास के सशक्त माध्यम बने हावय। ओमन किहिन के लइका के उज्जवल भविष्य अउ महतारी मन के स्वास्थ्य के सुरक्षा के खातिर राज्य म केऊ योजना मन प्रभावी रूप ले संचालित करे जात हावयं।

महिला अउ बाल विकास मंत्री श्रीमती लक्ष्मी राजवाड़े ह किहिन के मुख्यमंत्री विष्णुदेव साय के अगुवई म विभाग डहर ले करे  जात नवाचार ले छत्तीसगढ़ म आंगनबाड़ी केन्द्र के सूरत बदलत हावय। ओमन किहिन के आंगनबाड़ी अब सिरिफ पोषण के केंद्र नहीं, बल्कि लइका के बौद्धिक, शारीरिक अउ सामाजिक विकास के आधार बन चुके हावयं।

छत्‍तीसगढ़ी समाचार, अनुवादक- जयंत साहू