मंत्री लक्ष्मी राजवाड़े गोबरी नाला मं बनत अस्थायी रपटा पुल के करिन निरीक्षण

महिला अउ बाल विकास मंत्री अउ भटगांव विधायक श्रीमती लक्ष्मी राजवाड़े ह भैयाथान विकासखण्ड के जीवनरेखा कहाय वाले गोबरी नाला मं बनत अस्थायी रपटा पुल के स्थल निरीक्षण करिन। मंत्री ह काम के प्रगति ला बारीकी ले देखिन अउ लोक निर्माण सेतु विभाग के अधिकारी मन ला साफ निर्देश दिस – निर्माण काम मं तेजी लाय जावय अउ हर हाल मं जल्दी पूरा करे जावय।

निरीक्षण के दौरान मंत्री राजवाड़े ह पुल बनाय मं जुटे तकनीकी अमला अउ जिम्मेदार अधिकारी मन ले जानकारी लीन अउ जरूरी निर्देश घलो दिस। वो ह कहिन – “ये काम जनहित ले जुड़े हे, एकर प्राथमिकता सबसे ऊपर हे। लापरवाही अउ देरी कतई बर्दास्त नई होही।”

जानबा होय के भारी बरसात के सेती दू महीना पहिली गोबरी नाला ऊपर बने पुल टूट गे रहिस। एकरे सेती खुटरापारा, डबरीपारा, गंगोटी, बांसापारा समेत 10 ले जियादा ग्राम पंचायत के हजारों लोगमन ल आवाजाही मं भारी दिक्कत झेले ला परत रहिस। रोज के जरूरी काम, लइका मन के पढ़ई अउ मरीज़ मन के इलाज मं बाधा आवत रहिस। ग्रामीण मन ला 20 किलोमीटर जियादा के चक्कर लगाना परत रहिस।

निरीक्षण के बखत मंत्री राजवाड़े ह ग्रामीण मन ले चर्चा करिन अउ भरोसा दिलाइन के अस्थायी रपटा पुल जल्दी बन जाही, जेकर ले आवाजाही सामान्य हो जाही। मंत्री ह अधिकारी मन ला कड़ा अंदाज मं कहिन के काम के गुनवत्ता अउ गति दुनों पर समान ध्यान दे जावय।

अस्थायी रपटा पुल जल्दी बन जाही त डुमरिया ले गंगोटी तक के सड़क मार्ग मं फेर यातायात सुरू हो जाही अउ हजारों ग्रामीण मन ला बड़ सोहलियत मिलही।