एल्सा घोष 'टीना' अउ अमलेश नागेश 'टप्पर' के कर ले तै मया के चिन्हारी..., ‘टीना टप्पर’ फिल्म के सदाबहार गीत सुदंरानी यूट्यूब चैनल म रिलीज

छत्तीसगढ़ी सिनेमा बर 10 नंवबर के दिन बहुत खास रिहिस, ये दिन छॉलीवुड के तीन बड़े फिलिम के सोशल मीडिया म एके संघरे धमाका होइस। 20 दिसंबर के रिलीज होवइया प्रणव झा के फिलिम ‘टीना टप्पर’ के गीत रिलीज होइस अउ 22 नवंबर ले रिलीज होवइया फिलिम ‘बेटा’, ‘तीज के लुगरा 2’ के ट्रेलर जारी करे गिस। सबले पहिली बात करे जाए मितान मूवीस के बैनर तरी बने छत्तीसगढ़ी फिलिम ‘टीना टप्पर’ के त ये 20 दिसंबर के रिलीज होवइया हाबे अउ येकरे संग सोशल मीडिया के सुंदरानी युट्यूब चैनल म पहिली गाना ‘कर ले तै मया के चिन्हारी’ आगे हावय।

'ले सुरू होगे मया के कहानी' ले छॉलीवुड म जबरदस्त धूम मचाने वाला जोड़ी अमलेश नागेश अउ एल्सा घोष एक बार फेर उही अंदाज म 'टीना टप्पर' म नजर आही। ‘कर ले तै मया के चिन्हारी’ गीत म दूनो के आरूग मया ल गजब सुंदर ढंग ले दिखाये गे हावय। विष्णु कोठारी के शब्द ल श्याम हाजरा, तरूण गढ़पाले, प्रणव झा मन सुमधुर संगीत ले सजाये हाबे। गीत अउ संगीत दूनो ह मन ल भाथे, घेरी-बेरी सुने के मन करथे। गीत के जतके सुंदर शब्द संयोजन हावय ओतके सुग्घर ढंग ले सुनील सोनी अउ कंचन जोशी मन झुमके गाये हाबे। लोकधुन म साराबोर गीत ल नायक अमलेश नागेश अउ नायिका एल्सा घोष ऊपर फिल्माये गे हावय। दूनो के जोड़ी चुकचुक ले फबत हावय। पारंपरिक परिधान म खुबसूरत अदाकारा एल्सा घोष ह छत्तीसगढ़ी लोकधुन म बहुत ही शानदार भावाभिनय करे हाबे। सिरतोन म मन झुमर जथे, गीत संगीत अउ फिल्मांकन ल देखके। 

बहरहाल गाना तो बहुत संदर लागिस अब फिलिम के अगोरा हावय जेन 20 दिसंबर ले प्रदेश के सिनेमाघर म रिलीज होही। फिलिम म अहम किरदार म अमलेश नागेश, एल्सा घोस, पप्पू चंद्राकर, फेकू-पूनम, नीतिन कॉमेडियन, अंजली चौहान, राजेश बाघमारे, उपेन्द्र वर्मा, अनिता वर्मा, ताबिर हुसैन, विकास साहू आदि नजर आही।   

Movie Details :-

• Film - Teena Tappar 
• Cast - Amlesh nagesh, Elsa Ghosh, Nitesh Comedian, Pappu Chandrakar, Pheku poonam, anjali chauhan, rajesh baghmare, upendra tyagi, anita verma, tabir hussain, vikas sahu, devansh virvani
• Writter Director - PRANAV JHA
• Production House - Mitan movies
• Producer - Roshan Virvani, Ajay Singh.
• Lyric - Vishnu kothari
• Music - Shyam Hajra, Tarun Gadhpayle, Pranav Jha.
• Singer - Sunil Soni, Kanchan Joshi.
• Choreography - Chandan deep, Sanju Tandi
• DOP - Dhruvan
• Digital Media Partner - Cinema 36
• Associate Director - Yuvraj sahu, Vikas sahu.
• Make up - Shivam Thakur
• Costume - Veer Kenwat
• Youtuber : Soumya Ranjan Rana
• Language: Chhattisgarhi