सिनेमा। सिनेमाघर म अब हर सप्ताह नवा नवा छत्तीसगढ़ी फिलिम के आना अब ये बात कोति इशारा करथे के अब छॉलीवुड एक उद्योग के रूप ले डारे हावय। नायक/ नायिक, खलनायक अउ सहायक कलाकार मनके अलावा टेक्नीशियन मनके बुता अब सरलग चलते हावय। बात जब नवा-नवा फिलिम हो तो कलाकार मनला कइसे बिसारे जा सकथे, नायक/ नायिका अउ कलाकार मन धड़ाधड इंडस्ट्री म डेब्यू करत हाबे। इही ओढर म आरो मिले हावय के चकोर फिल्मस् के बैनर तरी बने छत्तीसगढ़ी फिलिम ‘बेटा’ ले पुमंगराज ह छत्तीसगढ़ी सिनेमा म डेब्यू करत हावय।
बेटा म पुमंगराज के संग बतौर नायिका हेमा शुक्ला हावय। निर्माता निर्देशक चंद्रशेखर चकोर के ड्रीम प्रोजेक्ट ‘बेटा’ 5 जुलाई 2024 के सिनेमाघर म प्रदर्शित होही अउ येकर टीजर ल 27 अप्रेल ले क्रिएटिव विजन म देखे जा सकत हावय। जानबा होवय के चंद्रशेखर चकोर ‘बेटा’ के पहिली ‘गुरांवट’ जइसे महान पारिवारिक फिल्म के निर्माण करे रिहिस जेला लोगन मन गजब मन करे रिहिस। बहरहाल अभी तो बेटा के सिरिफ टीजर आवथाबे। येकर बाद ट्रेलर अउ गाना मन दनादन सोशल मीडिया म परोसे जाही। मन लगाके देखिहा-सुनिहा अउ मया दुलार देहव।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।