भूमकाल’ आंदोलन के नायक गुंडाधुर के मूरति के मुख्यमंत्री भूपेश बघेल ह करिन अनावरण

अंजोर.बस्तर। मुख्यमंत्री भूपेश बघेल अपन एक दिवसीय बस्तर प्रवास के बखत कुमरावंड स्थित शहीद गुंडाधुर कृषि कॉलेज परिसर म भूमपाल विद्रोह के जननायक रिहिन वीर गुंडाधुर के आदमकद प्रतिमा के अनावरण करिन।

मुख्यमंत्री भूपेश बघेल ह ए मउका म अपन संक्षिप्त उद्बोधन म किहिन के बस्तर के आदिवासी जननायक म एक रिहिन वीर गुंडाधुर ह भूमकाल जइसे महान विद्रोह के अगुवई करिन। आज उंकर प्रतिमा स्थापित करके उंकर योगदान के चिरस्थाई बनाये के काम करे गे हावय। ओमन किहिन के कॉलेज परिसर म प्रतिमा स्थापित होए ले हमर युवा तको उंकर अदम्य साहस अउ वीरता ले परिचित हो सकही। बस्तर क्षेत्र म स्वतंत्रता संग्राम ले लेके आदिवासी संस्कृति के संरक्षण संवर्धन के खातिर बस्तर के आदिवासी नायक सदैव मुखर रिहिन अउ अपन सर्वोच्च बलिदान दीस। सरकार तको बस्तर सहित समूचे छत्तीसगढ़ केआदिवासी संस्कृति के सहेजे खातिर संकल्पित होके बुता करत हावय।

मुख्यमंत्री के निर्देश के मुताबिक बस्तर क्षेत्र आदिवासी विकास प्राधिकरण मद ले मंजूर रकम दस लाख ले बने शहीद वीर गुण्डाधुर के मूरति के अनावरण के बखत मुख्यमंत्री बघेल गांव नेतानार ले पहुंचे वीर गुंडाधुर के घर वाला म उंकर परपोते जयदेव नाग, पुनु नाग, दुलारू नाग, परदेसी नाग ले तको मुलाकात करिस।

ए मउका म उद्योग मंत्री कवासी लखमा, बस्तर सांसद दीपक बैज, बविप्रा के अध्यक्ष लखेश्वर बघेल, बविप्रा के उपाध्यक्ष विक्रम मंडावी,पूर्व सांसद नंद कुमार साय, संसदीय सचिव रेखचन्द जैन,  विधायक नारायणपुर चंदन कश्यप, संजरी बालोद विधायक श्रीमती संगीता सिन्हा, महापौर श्रीमती सफीरा साहू, नगर पालिका अध्यक्ष श्रीमती कविता साहू, इंद्रावती बेसिन विकास प्राधिकरण के उपाध्यक्ष राजीव शर्मा, संभागायुक्त श्याम धावड़े,  आईजी सुंदरराज पी., कलेक्टर विजय दयाराम के. वरिष्ठ पुलिस अधीक्षक जितेन्द्र मीणा सहित आन जनप्रतिनिधिगण उपस्थित रिहिस।