लोक अभियोजन अधिकारी एडीपीओ सोहन साहू ल मिलही पुलिस प्रशिक्षण खातिर युनियन होम मिनिस्टर मेडल

पुलिस प्रशिक्षण खातिर एडीपीओ सोहन साहू युनियन होम मिनिस्टर मेडल ले होही सम्मानित

अंजोर.रायपुर। एडीपीओ सोहन साहू युनियन होम मिनिस्टर मेडल ले होही सम्मानि। ए साल गणतंत्र दिवस के मउका म राज्यपाल सुश्री अनुसुइया उइके डहर ले उत्कृष्ट पुलिस प्रशिक्षण के खातिर पहिली बार कोनो सहायक जिला अभियोजन अधिकारी ल तको युनियन होम मिनिस्टर मेडल ले अलंकृत करे जाही। चंदखुरी के नेताजी सुभाष चंद्र बोस राज्य पुलिस अकादमी पदस्थ एडीपीओ सोहनलाल साहू ए मेडल ले सम्मानित होवइया पहिली लोक अभियोजन अधिकारी होही।

वइसने त गणतंत्र दिवस के मउका म आयोजित होवइया मुख्य समारोह म यहू दरी पुलिस  अधिकारी मनला साहस-पराक्रम, विशिष्ट सेवा, उत्कृष्ट बुता के संग-संग प्रशिक्षण के क्षेत्र म तको सम्मानित करे जाही। फेर प्रदेस म ये पहिली बार होही के पुलिस प्रशिक्षण के खातिर विभागीय  अधिकारी मनके संग कोनो लोक अभियोजन अधिकारी ल तको मेडल मिलही।

जानबा होवय के चंदखुरी के नेताजी सुभाष चंद्र बोस राज्य पुलिस अकादमी पदस्थ सोहनलाल साहु पुलिस  अधिकारी मनला कानून के आने-आने विधा मन के प्रशिक्षण देत हावय। ए साल ओला उत्कृष्ट पुलिस प्रशिक्षण के खातिर युनियन होम मिनिस्टर मेडल फोर एक्सीलेंसी ये पुलिस ट्रेनिंग ले नवाजे जाही। सोहनलाल साहू राज्य शासन के 2010 बैच के सहायक जिला अभियोजन अधिकारी हवय।