गणतंत्र दिवस के तइयारी पूरा, स्कूली लइका डहर ले सांस्कृतिक कार्यक्रम के प्रस्तुति दे जाही

अंजोर.बिलासपुर। जिला स्तरीय गणतंत्र दिवस समारोह के आखरी फुल ड्रेस रिहर्सल पुलिस परेड ग्राउंड म करे गिस। एडीएम आर.ए. कुरूवंशी ह रिहर्सल म मुख्य पहुना के दायित्व निभाते होइस ध्वजारोहण करिन। ए मउका म वरिष्ठ पुलिस अधीक्षक श्रीमती पारूल माथुर तको मौजूद रिहिस। फाइनल रिहर्सल म मुख्य पहुना के आगमन, स्वागत, ध्वजारोहण, परेड सालामी, मार्च पास्ट, मुख्य पहुना डहर ले परेड कमाण्डों ले परिचय, पुरस्कार बाटे उक के रिहर्सल करे गिस। जानबा होवय के छ.ग. शासन के लोक निर्माण, गृह, जेल अउ पर्यटन विभाग के संसदीय सचिव विकास उपाध्याय जिला मुख्यालय के पुलिस परेड ग्राउंड म आयोजित मुख्य समारोह म ध्वजारोहण करही। जानबा होवय के ए साल स्कूली लइका डहर ले सांस्कृतिक कार्यक्रम के प्रस्तुति दे जाही अउ विभाग डहर ले सरकारी योजना मन ले संबंधित झांकी के प्रदर्शन तको करे जाही।

एडीएम अउ पुलिस अधीक्षक ह आखरी रिहर्सल के अवलोकन करके बेवस्था के जायजा लिस। एडीएम ह कार्यक्रम के तइयारी के संबंध म अधिकारी मनला जरूरी निर्देश दिस। रिहर्सल के बखत गणतंत्र दिवस समारोह के परेड के अगुवई परेड कमाण्डर प्रशिक्षु डीएसपी श्रीमती नुपूर उपाध्याय ह करिन। ए मउका म एसडीएम बिलासपुर श्रीकांत वर्मा सहित आने-आने विभाग के जिला स्तरीय अधिकारी अउ पुलिस विभाग के अधिकारी-कर्मचारी मौजूद रिहिस।