छत्तीसगढ़ी फिल्म मैं हवं रोमियो गंवई के 20 जनवरी ले रिलीज होही, देखव गुलशन साहू अउ हेमा शुक्ला के शानदार अदाकारी

छत्तीसगढ़ी फिल्म मैं हवं रोमियो गंवई के 20 जनवरी ले

अंजोर.सिनेमा। माता परमेश्वरी फिल्म के बैनर तले बने छत्तीसगढ़ी फिलिम ‘मैं हवं रोमियो गंवई के’ 20 जनवरी ले प्रदेस के चुनिंदा सिनेमाघर म प्रदर्शित होवइया हावय। निर्माता-निर्देशक हावय लखन देवांगन पेंडरवानी वाले। फिलिम म अहम किरदार म नजर आही गुलशन साहू, हेमा शुक्ला, शिल्पा मानिकपुरी, मनीष साहू, प्रतिभा चौहान, यश ओझा, उर्वशी साहू, उपासना वैष्णव, ललित उपाध्याय, लखन देवांगन, सरला सेन अउ संतोष निषाद उक।

फिल्म के ट्रेलर हाल ही म सोशल मीडिया म रिलीज करे गे हावय। ट्रेलर ले कहानी के अंदाजा लगाबो त, आन दूसर फिलिम के रकम ले लव अउ रोमांस ले फिलिम के ओपनिंग होवत हावय, नायक ल हसीना मनके आगू-पाछू देखाये जाथे। मैं हवं रोमियो गंवई के जइसे के फिलिम के टाईटल तको रख गे हावय। खुशमिजाज अउ दिलफेक अदा ले गुलशन साहू ह देखइया ला भरपूर मनोरंजन कराथे तभेच अचानक फिलिम म अइसे मोड़ आथे के हास्य अउ प्रेम कहानी थ्रीलर-एक्शन म बदल जाथे।

अदाकारी के बात करें त छॉलीवुड के अनुभवी अउ दिग्गज कलाकार ललित उपाध्याय, उपासना वैष्णव, उर्वशी साहू, सरला सेन अउ संतोष निषाद के बीच गुलशन साहू, हेमा शुक्ला, शिल्पा मानिकपुरी, मनीष साहू, प्रतिभा चौहान तको खूब जमें हावय।

गीत अउ संगीत बहुत ही कर्णप्रिय हावय सुनिसल सोनी, अनुराग शर्मा, चंपा निषाद, रिंकू पांडे अउ सृष्टि नायक ह रिंकू पांडे,फागू तारक, गोविंद विश्वकर्मा अउ आशीष वैष्णव के गीत मनला आवाज दे हावय। जेला मधुर संगीत ले सजाया हावय कुलदीप सार्वा अउ रिंकू पांडे ह।

बहरहाल फिलिम के बारे म अभी जादा कुछ कहे के जरूरत नइ हावय काबर के 20 जनवरी के प्रदेस के धमतरी, राजीव बालोद, दल्ली राजहरा, कांकेर, कोंडागांव, नारायणपुर, जगदलपुर, सुकमा, बीजापुर, दंतेवाड़ा उक शहर म प्रदर्शित होवइया हावय। तंहू मन जरूर देखव अपन लकठा के सिनेमाघर म अउ हां सोशल मीडिया म ट्रेलर के संग ही गाना के तको आनंद ले जा सकत हावय।