 |
| राष्ट्रीय जम्बूरी म छत्तीसगढ़ के कॉन्टिजेंट ल 4 प्रतियोगिता म मिलिस ए ग्रेड |
अंजोर.रायपुर। छत्तीसगढ़ के कॉन्टिजेंट ह भारत स्काउट्स अउ गाइड्स के 18 वीं राष्ट्रीय जम्बूरी म जोरदार उपस्थिति दर्ज करात चार प्रतियोगिता म ‘ए ग्रेड’ मिले हाबे। राजस्थान के रोहट, पाली म 4 ले 10 जनवरी तक आयोजित राष्ट्रीय जम्बूरी के सुरू राष्ट्रपति द्रोपदी मुर्मू ह करिन। छत्तीसगढ़ के प्रदर्शनी पूरा जम्बूरी म आकर्षण के केन्द्र बने हावय। छत्तीसगढ़ लड़की मन के सुरक्षा ले जुड़े साइंस प्रोजेक्ट ल भी लोगन ह काफी दिलचस्पी देखाई।
छत्तीसगढ़ कॉन्टिजेंट ह दू समिलहा प्रतियोगिता राज्य प्रदर्शनी अउ एथनिक शो म ‘ए ग्रेड मिले हावय। ये दुनों प्रतियोगिता म छत्तीसगढ़ के कला संस्कृति के प्रदर्शित करे गे रिहिस। इही रकम ले स्काउट विंग ह मार्चपास्ट अउ गाइड विंग ह फिजिकल डिस्प्ले म ए ग्रेड मिले हाबे। येकर संग ही समिलहा प्रतियोगिता म ग्लोबल डेवलपमेंट विलेज, कलर पार्टी, पेजेंट शो, फूड प्लाजा, फोक डांस म ‘बी ग्रेड’ मिले हाबे। स्काउट विंग के प्रतियोगिता कैम्प फायर अउ फिजिकल डिस्प्ले अउ गाइड विंग के प्रतियोगिता स्टेट गेट अउ रंगोली म तको ‘‘बी ग्रेड‘‘ हासिल होइस।
जानबा होवय के स्कूल शिक्षा मंत्री अउ भारत स्काउट्स अउ गाइड्स के अध्यक्ष डॉ. प्रेमसाय सिंह टेकाम अउ संसदीय सचिव विनोद सेवनलाल चन्द्राकर के मार्गदर्शन अउ राज्य सचिव कैलाश सोनी के अगुवाई म छत्तीसगढ़ ले 381 के संख्या वाला दल राष्ट्रीय जम्बूरी म सामिल होइस। एमे 24 जिला ले लगभग तीन सौ स्काउट्स, गाइड्स सहित लीडर्स, राज्य मुख्यालय स्टॉफ, सर्विस रोवर्स, रेंजर्स सामिल रिहिस। प्रतियोगिता के अलावा स्काउट्स, गाइड्स ह एडवेंचर, फन गेम्स, नाइट हाइक उक गतिविधी म सक्रिय भागीदारी करिस। स्काउट विंग के कॉन्टिजेंट लीडर सीएल चन्द्राकर अउ गाइड विंग के कॉन्टिजेंट लीडर सीमा साहू थीं। शैलेन्द्र मिश्रा ह नेशनल स्टॉफ के तौर म अपन सेवा दीस। 18वीं राष्ट्रीय जम्बूरी म भारत के स्काउटिंग के सबो राज्य सहित सात आन देश ले 37 हजार स्काउट्स, गाइड्स, रोवर्स, रेंजर्स ह भागीदारी करिस।
छत्तीसगढ़ स्टेट डे म लोक संस्कृति के झलक, चलित झांकी प्रदर्शन ह जीतिस दिल
राष्ट्रीय जम्बूरी म छत्तीसगढ़ ह ‘‘स्टेट डे‘‘ मनाइस। ए कार्यक्रम के मुख्य पहुना भारत स्काउट्स अउ गाइड्स के राष्ट्रीय उपाध्यक्ष अउ विधायक, सत्यनारायण शर्मा रिहिस। अध्यक्षता छत्तीसगढ़ के राज्य मुख्य आयुक्त अउ संसदीय सचिव, विनोद सेवनलाल चन्द्राकर ह करिस। राष्ट्रीय जम्बूरी के चौथा दिन आयोजित चलित झांकी प्रदर्शन म छत्तीसगढ़ स्टेट कॉन्टिजेंट के पारंपरिक परिधान म प्रस्तुति ह दिल जीत लिस। झांकी के अगुवई सीमा साहू करत रिहिस। छत्तीसगढ़ महतारी के प्रतिरूप म लीना वर्मा राज्य के परछाई बने रिहिस। पाछु छत्तीसगढ़ के अमर शहीद वीर नारायण सहित गुंडाधुर, साहित्यकार पंडित सुंदरलाल शर्मा के रूप म स्काउट्स अउ ट्राइबल मूवमेंट के सुरता देवात हिमधर साहू के अगुवाई म कबीला नृत्य लोगन के आकर्षण के केन्द्र बने रिहिस। माई के पालकी- बस्तर दशहरा-आंगा देव आदिवासी समाज के आस्था के प्रदर्शित करत रिहिस। छत्तीसगढ़ शासन के योजना नरवा- गरवा- घुरवा- बाड़ी के प्रदर्शन छत्तीसगढ़ के माटी ले जुड़ाव के दर्शात रिहिस। छत्तीसगढ़ के लोक परब भोजली अउ येकर पाछु राउत नाचा, पंथी, सुआ नृत्य राज्य के संस्कृति के झलक दिखला रिहिन रिहिस। सरगुजा के बिहाव के परंपरा अउ करमा नृत्य ह लोगन के खूब वाहवाही बटोरिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।