यात्री बस म बड़का कार्रवाई, डेढ़ लाख रूपिया ले जादा के कटिस चालान

अंजोर.रायपुर। रायपुर ज़िला म क्षेत्रीय परिवहन अधिकारी ह यात्री बस म कार्रवाई करत दू दिन म एक लाख 70 हज़ार रूपिया के जुर्माना वसूल करे हावय। तिहारी सीजन म बस ले यात्रा करइया लोगन के सुविधा ल लेके ये कार्रवाई करे गे हावय। क्षेत्रीय परिवहन अधिकारी ह दू दिन लम्बा अउ छोटे दूरी म चले वाला लगभग 75 बस म चेकिंग के बखत ये कार्रवाई करे हावय। ज़िला के कलेक्टर डॉ सर्वेश्वर भुरे ह यात्री के सुविधा के खातिर बस के सघन चेकिंग के निर्देश दे रिहिस। कलेक्टर ह स्थानीय समाचार पात्र म ए बारे म प्रकाशित खबर म तको स्वतः संज्ञान लेके परमिट नियम के उल्लंघन करइया बस संचालक अउ चालक के विरुद्ध कार्रवाई के निर्देश आर टी ओ ल दे हावय।

क्षेत्रीय परिवहन अधिकारी ह बताइन के ज़िला म चलइया यात्री बस के औचक चेकिंग के अभियान चलाये जात हावय। कई रेल गाड़ी रद्द होए ले अभी चल रिहिन तिहार के बखत बस म यात्री के संख्या तको बढ़ाहे हावय। यात्री के सुविधा ल देखत कलेक्टर के निर्देश म बस के चेकिंग करे जात हावय। ओमन बताइन के दू दिन म 75 बस म परमिट शर्त के उल्लंघन म चालानी कार्रवाई करके एक लाख 70 हज़ार रूपिया जुर्माना वसूल करे गे हावय। आर टी ओ ह बताइन के अधिकांश बस म यात्री ले करार दर ले जादा किराया ले, किराया ले उचित टिकट नइ देने, बस म करार किराया सूची नइ लगाये, चालक- परिचालक डहर ले वर्दी नइ पहने ले लेके सही समय म बस नइ चले जइसे परमिट के शर्त के उल्लंघन म कार्रवाई करे गे हावय। ओमन ये तको बताइन के यात्री के सुविधा के खातिर अइसे कार्रवाई आगू तको जारी रइही। परिवहन अधिकारी ह सबो बस संचालक अउ चालक-परिचालक ले बस के परमिट शर्त के हिसाब ले ही चलाये के अपील करे हावय।