अंजोर.रायपुर। राजधानी रायपुर म शतरंज के बिसात म शह-मात के खेल जारी हावय। शतरंज के मोहरा के संग ये खेल मास्टर्स कैटेगरी के प्रतियोगिता होटल ग्रेंड इम्पीरिया म चलत रेहे हावय। उहें चैलेंजर्स कैटेगरी के प्रतियोगिता के समापन हो चुके हावय। छत्तीसगढ़ म शतरंज के इंटरनेशनल टूर्नामेंट के आयोजन मुख्यमंत्री भूपेश बघेल के पहल म होवत हाबे। छत्तीसगढ़ चीफ मिनिस्टर ट्रॉफी इंटरनेशनल ग्रैंडमास्टर्स चेस टूर्नामेंट के टाइटल ले ये आयोजन बीते 19 सितम्बर ले सुरू होइस हावय। एमे भारत के आने-आने राज्य समेत 15 देश के 500 ले जादा शतरंज खिलाड़ी भाग लेवइया के रूप म सामिल होए हावयं।
जानबा होवय के मुख्यमंत्री भूपेश बघेल अउ खेल मंत्री उमेश पटेल के निर्देश म अखिल भारतीय शतरंज महासंघ, खेल अउ युवा कल्याण अउ छत्तीसगढ़ ओलंपिक एसोसिएशन के मार्गदर्शन अउ संरक्षण म छत्तीसगढ़ प्रदेस शतरंज संघ डहर ले छत्तीसगढ़ चीफ मिनिस्टर ट्रॉफी इंटरनेशनल ग्रैंडमास्टर्स चेस टूर्नामेंट के आयोजन करे जात हावय। ए इंटरनेशनल टूर्नामेंट म हिस्सा ले पहुंचे खिलाड़ी म 16 ग्रैंड मास्टर, 27 इंटरनेशनल मास्टर, 03 वीमेन ग्रैंड मास्टर, 11 वीमेन इंटरनेशनल मास्टर, 14 फीडे मास्टर, 375 इंटरनेशनल रेटेड प्लेयर्स समेत आन वर्ग के खिलाड़ी सामिल हावयं।
कोन-कोन देश के खिलाड़ी हावयं-
छत्तीसगढ़ चीफ मिनिस्टर ट्रॉफी इंटरनेशनल ग्रैंडमास्टर्स चेस टूर्नामेंट म भारत के केऊ राज्य के शतरंज खिलाड़ी के संग ही रूस, यूक्रेन, जॉर्जिया, यूएसए, कज़ाकिस्तान, मंगोलिया, पोलैंड, वियतनाम, कोलंबिया, ईरान, श्रीलंका, बांग्लादेश, जिम्बाब्वे अउ नेपाल ले शतरंज के महारथी अउ खिलाड़ी पहुंचिस हावयं। इहां सबो खिलाड़ी बोर्ड म हर एक चाल म प्रतिद्वंदी खिलाड़ी के मात देके अपन रैंकिंग सुधारे के कवायद म लगे हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।