सहनिर्देशिका अनुपमा मनहर ल सतनामी समाज कोति ले सिनेमा म जबर योगदान बर मिलिस मिनीमाता सुरता सम्मान

अंजोर.दुर्ग। अविभाजित मध्यप्रदेश के पहिली महिला सांसद ममतामयी गुरू मां मिनीमाता के सुरता म उंकर पुण्यतिथि के मउका म छत्तीसगढ़ सतनामी समाज कोति ले रायपुर के शहीद स्मारक भवन म बड़का जलसा के आयोजन करे गिस। जेमा सामाजिक प्रतिभा, कलाकार, समाजसेवी अउ आन क्षेत्र म जबर बुता करइया मनखे मनके सम्मान करे गिस।

जानबा होवय के मिनीमाता के मूल नाम मीनाक्षी देवी रिहिस। उंकर जनम 13 मार्च 1913 के असम राज्य के दौलगांव म होइस। ओमान असमिया, अंग्रेजी, बांगला, हिन्दी अउ छत्तीसगढ़ी भाषा जानय। उंकर बिहाव गुरूबाबा घासीदास जी के वंशज गुरू अगमदास ले होइस। बिहाव के बाद वो छत्तीसगढ़ आईस, तब ले ओमन ए क्षेत्र के विकास के खातिर अपन जीवन समर्पित कर दीस। गुरू अगमदास जी के प्रेरणा ले स्वाधीनता के आंदोलन, समाजसुधार अउ मानव उत्थान बुता म ओमन बढ़-चढ़के हिस्सा लिस। मिनीमाता सन् 1951 ले 1971 तक सांसद के रूप म लोकसभा के सदस्य रिहिस। छत्तीसगढ़ के पहिली महिला सांसद के रूप म दलित अउ महिला मनके उत्थान खातिर करे बुता के सेला उनला सदा सुरता करे जाही।

मिनीमाता के सुरता म रायपुर म आयोजित कार्यक्रम म छत्तीसगढ़ी सिनेमा म पाछु कई बछर ले सह निर्देशिका के काम करत बिलासपुर अंचल के सुश्री अनुपमा मनहर ल सिनेमा म जबर योगदान खातिर सम्मानित करे गिस। लेखिका, समाजसेवी, कलाकार सुश्री अनुपमा मनहार जी ल अंजोर परिवार डहर ले तको गाड़ा-गाड़ा बधाई।