मिनीमाता ह अपन सरी जीवन मानव सेवा बर समर्पित कर दीस : श्री भूपेश बघेल

अंजोर.रायपुर। घासीदास साहित्य अउ संस्कृति अकादमी, प्रगतिशील छत्तीसगढ़ सतनामी समाज के तनि ले मिनीमाता के सुरता म शहीद स्मारक भवन रायपुर म प्रतिभा सम्मान समारोह के आयोजन करे गे रिहिस। ये मउका म प्रदेश के मुखिया दाऊ भूपेश बघेल माई पहुना के रूप म आए रिहिस, कार्यक्रम म ओमन किहिन के किहिन के मिनीमाता के व्यक्तित्व अतुलनीय रिहिस। सरल अउ सहज व्यक्तित्व के धनी मिनीमाता ह अपन पूरा जीवन मानव सेवा के खातिर समर्पित कर दीस। दलित मनके नागरिक अधिकार के रक्षा के खातिर अस्पृश्यता निवारण अधिनियम ल संसद म पारित कराये म ओमन महती भूमिका निभाईस। बाल बिहाव अउ दहेज प्रथा के विरोध म ओमन समाज ले लेके संसद तक अपन आवाज उठाईस।

श्री बघेल आज राजधानी रायपुर के शहीद स्मारक भवन म मिनीमाता सुरता दिवस अउ प्रतिभा सम्मान समारोह के संबोधित करत पहिली महिला सांसद मिनीमाता के 50वीं पुण्यतिथि म डाक विभाग डहर ले जारी बिसेस आवरण के विमोचन करिन।

मुख्यमंत्री ह कार्यक्रम म आगू किहिन के मिनीमाता ह महिला अस्मिता के एक नवा ऊंचाई दे हावय। अपन प्रखर अगुवई क्षमता के बदौलत राष्ट्रीय नेता के बीच उंकर आने पहचान रिहिस। दलित शोषित समाज ही नइ सबो वर्ग ह उंकर अगुवई के मान्य रिहिस। मिनीमाता समाज हितैषी बुता के सेती ले लोकप्रियता के शीर्ष म पहुंचिस। छत्तीसगढ़ के पहिली महिला सांसद के रूप म ओला दलित अउ महिला मन के उत्थान के खातिर करे बुता के खातिर सदा सुरता करे जाही।

कार्यक्रम म नगरीय प्रशासन अउ श्रम मंत्री डॉ. शिवकुमार डहरिया ह कार्यक्रम के संबोधित करत सतनामी समाज के कोति ले गिरौदपुरी के नामकरण गुरू घासीदास गिरौदपुरी धाम करे  जाये म मुख्यमंत्री के प्रति आभार जताइस। कार्यक्रम म मुख्यमंत्री ह सतनामी समाज के उत्कृष्ट बुता करइया प्रतिभाशाली पढ़ईया मन अउ लोगन  ल सम्मानित तको करिन। ए मउका म रायपुर ग्रामीण विधायक सत्यनारायण शर्मा, रायपुर महापौर एजाज ढेबर, चरौदा के महापौर निर्मल कोसले सहित बड़ संख्या म सतनाम पंथ के अनुयायी उपस्थित रिहिस।