फिल्म अभिनेत्री उपासना वैष्णव अउ उर्वशी साहू ल मिलिस मिनीमाता सम्मान

अंजोर
0

फिल्म अभिनेत्री उपासना वैष्णव अउ उर्वशी साहू ल मिलिस मिनीमाता सम्मान

अंजोर.दुर्ग। अविभाजित मध्यप्रदेश के पहिली महिला सांसद ममतामयी गुरू मां मिनीमाता के सुरता म उंकर पुण्यतिथि के मउका म दुर्ग के सतनाम भवन म जलसा के आयोजन करे गे रिहिस। जेमा छत्तीसगढ़ी सिनेमा के बड़का कलाकार, समाजसेवी अउ आन क्षेत्र म जबर बुता करइया मनखे मनके सम्मान करे गिस।

जानबा होवय के मिनीमाता के मूल नाम मीनाक्षी देवी रिहिस। उंकर जनम 13 मार्च 1913 के असम राज्य के दौलगांव म होइस। ओमान असमिया, अंग्रेजी, बांगला, हिन्दी अउ छत्तीसगढ़ी भाषा जानय। उंकर बिहाव गुरूबाबा घासीदास जी के वंशज गुरू अगमदास ले होइस। बिहाव के बाद वो छत्तीसगढ़ आईस, तब ले ओमन ए क्षेत्र के विकास के खातिर अपन जीवन समर्पित कर दीस। गुरू अगमदास जी के प्रेरणा ले स्वाधीनता के आंदोलन, समाजसुधार अउ मानव उत्थान बुता म ओमन बढ़-चढ़के हिस्सा लिस। मिनीमाता सन् 1951 ले 1971 तक सांसद के रूप म लोकसभा के सदस्य रिहिस। छत्तीसगढ़ के पहिली महिला सांसद के रूप म दलित अउ महिला मनके उत्थान खातिर करे बुता के सेला उनला सदा सुरता करे जाही।

मिनीमाता के सुरता म दुर्ग के सतनाम भवन म आयोजित कार्यक्रम म प्रदेश के गृह मंत्री ताम्रध्वज साहू अउ लोकप्रिय पंथी कलाकार अमृता बारले जी के पहुनाई म सिनेमा के क्षेत्र म नारी मनके जबर भूमिका ल सुरता करत दुर्ग जिला के दू बड़का कलाकार श्रीमती उपासना वैष्णव अउ श्रीमती उर्वशी साहू ल मिनीमाता सम्मान ले अलंकृत करे गिस।

श्रीमती उपासना वैष्णव अउ श्रीमती उर्वशी साहू छत्तीसगढ़ी सिनेमा के चिन्हारी आए ओमन के बिगर कोनो भी फिलिम पूरा नइ होवे। सौ ले आगर फिलिम म ओमन काम कर चुके हाबे, ओतकेच अकन उंकर वीडियो एल्बम तको लोकप्रिय होए हाबे। दुनो के जोड़ी जोरदार मनोरंजन के गरेंटी देथे। सिनेमा म होवय चाहे लोकमंच उर्वशी अउ उपासना के जोड़ी धूम मचा देथे। अइसन कलाकार मनके सम्मान ले सवांगे सिनेमा सम्मानित अउ गरब महसूस करत हाबे। श्रीमती उपासना वैष्णव अउ श्रीमती उर्वशी साहू जी मनला अंजोर परिवार कोति ले तको गाड़ा-गाड़ा बधाई।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !