अंजोर.जगदलपुर, 26 मई। मुख्यमंत्री भूपेश बघेल ह जगदलपुर के महारानी अस्पताल म बर्न यूनिट अउ डी-एडिकक्सन यूनिट के लोकार्पण करिन। ओमन अस्पताल के नवा लोकार्पित वार्ड सहित अस्पताल के मैटरनिटी वार्ड, हमर लैब अउ ब्लड बैंक के निरीक्षण करिन। मुख्यमंत्री ह बर्न यूनिट के निरीक्षण के बखत स्टाफ ले कहिन- बहुत बढ़िया बने हावय, एला मेन्टेन करके रखहू।
महारानी अस्पताल म मातृ शिशु स्वास्थ्य संस्थान ‘‘कादम्बिनी’’ के जचकी पाछु देखभाल वार्ड म मुख्यमंत्री ह शिशुवती महतारी मन ले भेंट करिस। ओमन महतारी मन ल फल के टोकरी अउ बेबी केअर किट भेंट करिन। मुख्यमंत्री ह महतारी मनके शिशु के जनम म हार्दिक बधाई अउ लइका के उज्ज्वल भविष्य के खातिर सुभकामना दीस। ओमन अस्पताल म सीसीटीवी सहित सुरक्षा उक के बेवस्था के सम्बंध म पूछा अउ अस्पताल म कैंसर पीड़ित मरीज मनके इलाज अउ डॉ खूबचन्द बघेल योजना के तहत लोगन ल मिलत मुफ्त इलाज के सुविधा के सम्बंध म जानकारी लिस। मुख्यमंत्री ह अस्पताल म रोज भरती होत मरीज मनके संख्या तको पूछीस।
मुख्यमंत्री श्री बघेल ह महारानी अस्पताल परिसर म ब्लड बैंक अउ हमर लैब के निरीक्षण करिन। ओमन उहां ब्लड यूनिट कलेक्शन, डोनेशन क्लब के तहत जरूरतमंद मरीज मन के खून के उपलब्धता के जानकारी लिस। ओला बताइन के इहां के ब्लड बैंक ले क्रिटिकल मरीज मन के सबो ब्लड ग्रुप के ब्लड दे जात हावयं। मुख्यमंत्री ह हमर लैब म जांच कराये बर आये मरीज मनले उंकर हाल चाल जानिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।