मुख्यमंत्री भूपेश बघेल भेंट-मुलाकात बर बस्तर संभाग रवाना, देवगुड़ी अउ स्वामी अंग्रेजी स्कूल के होही लोकार्पण

मुख्यमंत्री भूपेश बघेल भेंट-मुलाकात

अंजोर.रायपुर, 18 मई। मुख्यमंत्री भूपेश बघेल भेंट-मुलाकात अभियान के दूसरइया चरण खातिर बस्तर संभाग के दौरे म रवाना होगे। श्री बघेल भेंट-मुलाकात के शुरूआत कोंटा विधानसभा ले करही।  मुख्यमंत्री कोंटा अउ छिंदगढ़ म आम जनता ले सोज मुलाकात करके शासन के योजना मनके जमीनी हकीकत के जायजा लेही। ओकर बाद वो सुकमा जाही। मुख्यमंत्री सुकमा म पुलिस लाईन के आफिसर्स मेस के लोकार्पण, शहीद पार्क म गांधी जी के प्रतिमा के अनावरण अउ सी-मार्ट के उद्घाटन करही। मुख्यमंत्री उहां संझा के आने-आने प्रतिनिधिमंडल ले भेंट-मुलाकात करे के बाद राजीव भवन के अवलोकन अउ जनप्रतिनिधी मन ले भेंट-मुलाकात करही। जानबा हावय के मुख्यमंत्री श्री भूपेश बघेल ह प्रदेस के सबो 90 विधानसभा क्षेत्र म भेंट-मुलाकात अभियान के शुरुआत ए महीना के 4 तारीख ले करे हावय।

मुख्यमंत्री ह 100 देवगुड़ी के जीर्णोद्धार बुता के करिन लोकार्पण

मुख्यमंत्री श्री भूपेश बघेल ह छिंदगढ़ म मुसरिया महतारी के दरसन करके प्रदेसवासी मनके खुसयाली अउ सुख समृद्धि के आशीर्वाद लिस। ओमन ए मउका म सुकमा जिला म 5 करोड़ रूपिया के लागत ले  100 देवगुड़ी के जीर्णोद्धार बुता के लोकार्पण करिन। दस लाख रूपिया के लागत ले बने वाला दू देवगुड़ी के भूमिपूजन तको करिन। ओमन ए मउका म देवगुड़ी के पुजारी ल धोती कुर्ता अउ पगड़ी भेंटकरके सम्मानित करिन। ओमन मुसरिया महतारी मंदिर प्रांगण  म बरगद के पौधा मन के रोपण तको करिन।

छिंदगढ़ म स्वामी आत्मानंद उत्कृष्ट अंग्रेजी माध्यम स्कूल के लोकार्पण करिन

मुख्यमंत्री भूपेश बघेल ह छिंदगढ़ म स्वामी आत्मानंद उत्कृष्ट अंग्रेजी माध्यम स्कूल के लोकार्पण करिन। मुख्यमंत्री ह स्कूल म समर कैंप म आए लइका ले भेंट के उंकर ले पढाई अउ आन गतिविधी के जानकारी लिस।