हरदीहा साहू समाज के प्रतिनिधिमंडल मुख्यमंत्री दाऊ भूपेश बघेल ले करिन भेट-मुलाकात, मांग म लघियात होइस कार्यवाही

अंजोर.रायपुर, 15 जनवरी। हरदीहा साहू समाज रायपुर के प्रतिनिधिमंडल ह अध्यक्ष डेरहाराम साहू के अगुवाई म मुख्यमंत्री दाऊ भूपेश बघेल ले उंकर निवास कार्यालय म सउंहे भेट-मुलाकात करिन। मिले आरो के मुताबिक प्रतिनिधिमंडल ह मुख्यमंत्री ल मकर संक्रांति अउ छेरछेरा के बधाई देवत छेरछेरा सहित आन छत्तीसगढ़ी परब म शासकीय अवकाश घोषित करे खातिर मुख्यमंत्री के आभार जताइन।  

प्रतिनिधिमंडल ह मुख्यमंत्री ल हरदीहा साहू समाज डहर ले आयोजित सामूहिक आदर्श विवाह के संबंध म जानकारी तको दीस। मुख्यमंत्री श्री बघेल ह हरदीहा साहू समाज के सामूहिक आदर्श विवाह आयोजन के सराहना करत, समाज के ये बुता ल अनुकरनीय बताइन। ये मउका म प्रतिनिधिमंडल ह दाऊ जी ल अपन मांग के संबंध म ज्ञापन सउपिन जेमा ओमन लघियात कार्यवाही करत, बेरा राहत काम ल उरकाये के भरोसा देवाइस। प्रतिनिधिमंडल म हरदीहा साहू समाज के प्रमुख सलाहकार/सदस्य- आर.डी.ए. मुकेश साहू, उपाध्यक्ष हरीशचंद्र साहू, शत्रुघ्न साहू, जनक साहू, बी.आर. साहू, खोरबाहरा राम साहू, गजाधर साहू सहित आन सियान तको जुरियाए रिहिस।