अंजोर.रायपुर, 15 जनवरी। छत्तीसगढ़ म अवइया पांच साल म 12 ले 15 लाख नवा रोजगार के मउका के सिरजन करे के खातिर राज्य शासन ह मुख्यमंत्री दाऊ भूपेश बघेल के अध्यक्षता वाला छत्तीसगढ़ रोजगार मिशन के गठन के फइसला ले हावय। मुख्य सचिव अमिताभ जैन येकर उपाध्यक्ष अउ प्रमुख सचिव आलोक शुक्ला मिशन के मुख्य कार्यपालन अधिकारी होही। लघु वनोपज संघ के प्रबंध संचालक सहित आने-आने वरिष्ठ अधिकारी येकर सदस्य होही।
राज्य म पाछु 3 साल म सबो जिला म रोजगार ल बढ़ावा दे के उद्देश्य ले केऊ अभिनव कार्यक्रम शुरू करे गे हावयं, जेकर ले बड़का रोजगार के स्थाई मउका के सिरजन होये हावय अउ लोगन के आय अउ जीवन स्तर म सुधार होइस हावय। छत्तीसगढ़ हर्बल्स के पहल के संग ही गोधन न्याय मिशन, टी-कॉफी बोर्ड, मछलीपालन अउ लाख उत्पादन के कृषि के दर्जा दे, रूरल इंडस्ट्रियल पार्क, मिलेट मिशन अउ वाणिज्यिक वृक्षारोपण जइसे कार्यक्रम के प्रभावी क्रियान्वयन ले राज्य म रोजगार के नवा मउका के सिरजन के असीमित संभावना हावय।
मिशन के माध्यम ले नगरीय अउ ग्रामीण क्षेत्र म संचालित कौशल विकास कार्यक्रम के संग ये नवा कार्यक्रम के समन्वय स्थापित करे जाही। संग ही राज्य म स्थित आईआईटी., ट्रिपल आई.टी. आई.आई.एम.,एन.आई.टी. जइसे आन संस्थान के विशेषज्ञता ल रोजगार के नवा मउका के सिरजन म लाभ ले जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।