मुख्यमंत्री भूपेश बघेल ल 28 नवम्बर के पुणे म ’महात्मा फुले समता पुरस्कार’ ले सम्मानित करे जाही, समाज के वंचित वर्ग ल न्याय देवाये के जबर बुता के खातिर दे जाही सम्मान

रायपुर, 27 नवम्बर। मुख्यमंत्री दाऊ भूपेश बघेल ल 28 नवम्बर के महात्मा फुले के 131वीं पुण्यतिथि समता दिवस के मउका म पुणे म बिहनिया 10 बजे ’महात्मा फुले समता पुरस्कार’ ले सम्मानित करे जाही। पुणे के महात्मा फुले स्मारक ’समता भूमि’ म अखिल भारतीय महात्मा फुले समता परिषद् डहर ले आयोजित समारोह म परिषद् के राष्ट्रीय अध्यक्ष छगन भुजबल छत्तीसगढ़ के मुख्यमंत्री श्री बघेल ल फुले पगड़ी, मानद शाल अउ सुरता चिनहा दे के सम्मानित करही।

जानबा होवय के समता दिवस के मउका म अखिल भारतीय महात्मा फुले समता परिषद् डहर ले सामाजिक, राजनीतिक, साहित्य, पत्रकारिता जइसे आने-आने क्षेत्र म जबर योगदान देवइया ल महात्मा फुले समता पुरस्कार ले सम्मानित करे जाथे। छत्तीसगढ़ के मुख्यमंत्री दाऊ भूपेश बघेल ह अपन कार्यकाल के बखत समाज के वंचित वर्ग के न्याय देवाये के दिशा म करे गे जबर बुता के खातिर ए साल के पुरस्कार के खातिर चुने गे हावय। मुख्यमंत्री श्री बघेल के नेतृत्व म छत्तीसगढ़ म किसान मन के फसल के उचित कीमत देवाये के खातिर राजीव गांधी किसान न्याय योजना, पशुपालक अउ भूमिहीन के आय अउ रोजगार ले जोड़ने के खातिर गोधन न्याय योजना अउ भूमिहीन कृषि मजदूर मन के सालाना 6 हजार रूपिया के मदद के उद्देश्य ले राजीव गांधी ग्रामीण भूमिहीन कृषि मजदूर न्याय योजना सुरू करे गे हावय। येकर संग ही संग आदिवासी, वनवासी अउ समाज के कमजोर वर्ग के लोगन के कल्याण के खातिर केऊ योजना सुरू करे गे हावयं, जेकर ले उंकर जीवन स्तर ऊपर उठे हावय।