छत्तीसगढ़ के मुख्यमंत्री दाऊ भूपेश बघेल ल महात्मा फुले समता पुरस्कार : chhattisgarhi samachar anjor

अंजोर.रायपुर, 28 नवम्बर। छत्तीसगढ़ के मुख्यमंत्री दाऊ भूपेश बघेल ल आज महात्मा ज्योतिबा फुले के 131 वीं पुण्यतिथि के मउका म पुणे म ’महात्मा फुले समता पुरस्कार’ ले सम्मानित करिन। पुणे के महात्मा फुले स्मारक ’समता भूमि’ म अखिल भारतीय महात्मा फुले समता परिषद् डहर ले आयोजित समारोह म परिषद् के राष्ट्रीय अध्यक्ष छगन भुजबल ह फुले पगड़ी, मानद शाल, सम्मान निधि अउ सुरता चिनहा दे के ’महात्मा फुले समता पुरस्कार’ ले सम्मानित करिन। ए मउका म मुख्यमंत्री दाऊ भूपेश बघेल ह किहिन के हिन्दुस्तान के पांच हजार साल के इतिहास म साढ़े तीन हजार साल पिछड़ा मनके राज रिहिन। फेर अंग्रेज के शासन काल म देश के अर्थव्यवस्था छिन्न-भिन्न हो गे। अइसे म महात्मा ज्योतिबा फुले ह समाज सुधार के माध्यम ले समतामूलक समाज के स्थापना के खातिर बुता करिन। महात्मा फुले सामाजिक क्रांति के अग्रणी नेता रिहिस,  त राष्ट्रपिता महात्मा गांधी राजनीतिक क्रांति के अग्रणी समाज सुधारक रिहिस। श्री बघेल ह किहिन के छत्तीसगढ़ म हम इही महात्मा के बताए रद्दा म चल करके सामाजिक न्याय के स्थापना के खातिर काम करे हावयं। 

मुख्यमंत्री श्री भूपेश बघेल ह अपन कार्यकाल के बखत समाज के वंचित वर्ग के न्याय देवाये के दिशा ले फैसल अउ असाधारण जरूरी बुता के खातिर ए साल के ’महात्मा फुले समता पुरस्कार’ के खातिर चुने गे हावय। मुख्यमंत्री के कार्यक्रम म महात्मा ज्योतिबा फुले के पुस्तक ’किसान के कोड़ा’ के प्रति भेंट करे गिस। येकर पहिली मुख्यमंत्री ह महात्मा फुले स्मारक ’समता भूमि’ म महात्मा फुले अउ श्रीमती सावित्री बाई फुले के प्रतिमा म माल्यार्पण करके ओला नमन करिन।