रायपुर, 27 नवम्बर। छत्तीसगढ़ी राजभाषा दिवस के मउका म 28 नवम्बर के छत्तीसगढ़ी राजभाषा आयोग कोति ले जबर जलसा के आयोजन करे जात हावय जेमा संस्कृति मंत्री श्री अमरजीत भगत ह प्रदेश के 19 साहित्यकार-भाषाविद मनके सम्माीन करही। ए कार्यक्रम के अध्यक्षता करही संसदीय सचिव कुंवर सिंह निषाद। कार्यक्रम के आयोजन राजभाषा आयोग डहर ले राजधानी रायपुर के महंत घासीदास संग्रहालय के सभागार म बिहनिया 9 बजे ले करे जाही।
छत्तीसगढ़ राजभाषा आयोग के सचिव डॉ. अनिल कुमार भतपहरी ह बताइन के कार्यक्रम म जेन साहित्यकार-भाषाविद ल सम्मानित करे जाही ओमा रायगढ़ के सेवानिवृत्त प्राचार्य अउ वरिष्ठ साहित्यकार डॉ. बिहारी लाल साहू, नवापारा खैजा के सेवानिवृत्त व्याख्याता हरप्रसाद निडर, शासकीय कॉलेज महासमुंद के प्राध्यापक डॉ. अनुसुईया अग्रवाल, सेवानिवृत्त प्रोफेसर अउ चंदैनी गोंदा के उद्घोषक डॉ. सुरेश देशमुख, मगरलोड के वरिष्ठ साहित्यकार पुनूराम साहू, दुर्ग के वरिष्ठ साहित्यकार अउ पहिली बैंक प्रबंधक अरूण निगम, कुडुख, सादरी अउ हिन्दी कविता अउ कहानी लेखक अउ सहायक प्राध्यापक जशपुर डॉ. कुसुम माधुरी टोप्पो, दुर्ग के वरिष्ठ साहित्यकार अउ गीतकार गिरवरदास मानिकपुरी, रायपुर के वरिष्ठ साहित्यकार अउ गीतकार अउ नगरीय प्रशासन संचालनालय म निज सचिव श्री रमेश विश्वहार, महासमुन्द के पूर्व सहायक पशु चिकित्सा परिक्षेत्राधिकारी बंधु राजेश्वर खरे, वरिष्ठ छत्तीसगढ़ी उद्घोषक अउ कार्यक्रम अधिकारी आकाशवाणी रायपुर के श्याम वर्मा, रायपुर के वरिष्ठ पत्रकार पहट पत्रिका गुलाल वर्मा, हरिभूमि चौपाल के सम्पादक डॉ. दीनदयाल साहू दुर्ग, न्यूज 24 म.प्र-छ.ग. के सम्पादकीय सलाहकार संदीप अखिल रायपुर, न्यूज 36 वेब चैनल के सम्पादक नवा देवांगन बिलासपुर, बिलासपुर के वरिष्ठ साहित्यकार सुश्री लता राठौर, सरगुजिहा भाषा के पत्रिका के प्रकाशक अउ सेवानिवृत्त बैक अधिकारी अंबिकापुर डॉ. सुधीर पाठक, गोंडी भाषा के साहित्यकार सुश्री जयमति कश्यप कोण्डागांव अउ रायपुर के वरिष्ठ छत्तीसगढ़ी उद्घोषिका श्रीमती तृप्ति सोनी सामिल हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।