गोबर के बिजली ले जगमगाही गउठान : 2 अक्टूबर गांधी जयंती ले छत्तीसगढ़ के गउठान म गोबर ले बिजली बनाये के शुभारंभ करही मुख्यमंत्री दाऊ भूपेश बघेल

अंजोर.रायपुर, 2 अक्टूबर। छत्तीसगढ़ के गउठान अब गोबर के बिजली ले जगमगाही। गउठान म स्थापित रूरल इंडस्ट्रियल पार्क म आने-आने रकम के जिनिस ल तइयार करे के खातिर लगे मशीन भी गोबर के बिजली ले चलही। गउठान अब बिजली के मामला म स्वावलंबी होही। मुख्यमंत्री दाऊ भूपेश बघेल 2 अक्टूबर के गांधी जयंती के दिन बेमेतरा जिला मुख्यालय के बेसिक स्कूल मैदान म आयोजित किसान सम्मेलन म गोबर ले बिजली उत्पादन के महत्वाकांक्षी अउ ऐतिहासिक परियोजना के शुभारंभ करही। राज्य के कई गउठान म गोबर ले बिजली उत्पादन के सबो तइयारी पूरा कर ले गे हावय।

राष्ट्रपिता महात्मा गांधी के जयंती 2 अक्टूबर 2021 के दिन छत्तीसगढ़ राज्य के खातिर अविस्मरणीय अउ ऐतिहासिक दिन होही। मुख्यमंत्री श्री बघेल 2 अक्टूबर के बेमेतरा जिला के साजा विकासखण्ड के आदर्श गउठान राखी सहित दुर्ग जिला के पाटन विकासखण्ड स्थित सिकोला गउठान अउ रायपुर जिला के आरंग विकासखण्ड स्थित बनचरौदा गउठान म गोबर ले विद्युत उत्पादन परियोजना के शुभारंभ करही। छत्तीसगढ़ शासन डहर ले गउठान म गोबर ले विद्युत उत्पादन के परियोजना ल लेके बीते कई महीना ले तइयारी करे जात रिहिस, जेन 2 अक्टूबर के पूरा होही। गोबर ले सस्ती बिजली उत्पादन होए के संग-साथ जैविक खातु के भी उत्पादन होही। येकर ले गउठान समिति मन अउ महिला स्व-सहायता समूह ल दोहरा लाभ होही।