अंजोर.रायपुर, 23 अक्टूबर। स्कूल शिक्षा विभाग के डहर ले सत्र 2019 म 14 हजार 580 शिक्षक मन के भरती खातिर विज्ञापन जारी करके व्यापम डहर ले परीक्षा आयोजित करे गे रिहिस। चयन प्रक्रिया कोरोना महामारी के सेती प्रभावित होए रिहिस, मिले आरो के मुताबिक अब तक व्याख्याता, शिक्षक अउ सहायक शिक्षक के कुल 7 हजार 188 पद म नियुक्ति आदेश जारी करे जा चुके हावय। जेमा व्याख्याता के विज्ञापित 3 हजार 177 पद म ले 2 हजार 894 पद म नियुक्ति आदेश जारी करे जा चुके हावय। इही रकम ले शिक्षक के 5 हजार 897 विज्ञापित पद म ले 2 हजार 110 पद म नियुक्ति आदेश जारी करे जा चुके हावय संग ही सहायक शिक्षक मन के विज्ञापित पद 5 हजार 506 पद म ले 2 हजार 184 पद म नियुक्ति आदेश जारी करे जा चुके हावय।
जानबा होवय के माननीय उच्च न्यायालय बिलासपुर म दायर याचिका म स्थगन आदेश प्रभावशील होए के सेती बस्तर, सरगुजा संभाग के जिला अउ कोरबा जिला ल मिलाके कुल 14 जिला म सहायक शिक्षक अउ शिक्षक के पद म नियुक्ति आदेश जारी नइ करे गे हावय। एक आन याचिका म सरी भरती प्रक्रिया म रोक लगाए जाये के आदेश प्रभावशील होए के सेती बांचे पद म चयनवार नियुक्ति आदेश जारी नइ करे गे हावय। माननीय उच्च न्यायालय म शासन के डहर ले अपन पक्ष रखे गे हावय। भरती प्रक्रिया संबंधित याचिका म अनुमति मिले म नियुक्ति संबंधी अवइया कार्यवाही करे जा सकही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।