लेखक विनोद कुमार शुक्ल ल मिलिस साहित्य अकादमी फेलोशिप, छत्तीसगढ़ दू करोड़ जनता कोति ले सेवा जोहार

अंजोर.रायपुर, 20 सितंबर। प्रदेश के बड़का कवि, लेखक विनोद कुमार शुक्ल ल साहित्य अकादमी फेलोशिप मिले के आरो सोशल मीडिया ले मिलत हावय। केऊ झीन कलमकार मन उनला ये सम्मान खातिर बधाई तको पठोवत हावय। मिले आरो के मुताबिक 18 सितंबर 2021 के साहित्य अकादमी नई दिल्ली म डॉ. चंद्रशेखर कम्बार के अध्यक्षता म होए बइठका म साहित्य अकादमी के सर्वोच्च सम्मान साहित्य अकादमी फेलोशिप खातिर हिंदी के कवि लेखक विनोद कुमार शुक्ल जी ल चुने गिस। 

उंकर संग ही अंग्रेजी म रस्किन बॉन्ड, बांग्ला म शीर्षेंन्दू मुखोपाध्याय, मलयालम म एम. लीलावती, तमिल म इंदिरा पार्थ सारथी अउ मराठी म भालचंद्र नेमाड़े ल साहित्य अकादमी ह फेलोशिप प्रदान करे के घोसना करे हावय। विनोद कुमार शुक्ल के पहिली ये विशिष्ट अउ गौरवशाली सम्मान हिंदी म सुमित्रा नंदन पंत, जैनेंद्र कुमार, महादेवी वर्मा, निर्मल वर्मा अउ डॉ. नामवर सिंह ल प्रदान करे गे हावय। विनोद कुमार शुक्ल ल साहित्य अकादमी डहर ले मिले फेलोशिप हिंदी भाषा सहित सरी छत्तीसगढ़ राज्य के सम्मान आए।