जशपुर जिला के सारूडीह, कांटबेल के बाद अब ग्राम गटरी म चाय बगान : बने पाग होए ले काजू, नाशपाति, लीची अउ आलू के सुघ्घर खेती

अंजोर.रायपुर, 10 सितम्बर। राज्य सरकार डहर ले प्रदेश म किसान मनला आने-आने लाभकारी फसल मन के प्रोत्साहन ले अब जशपुर जिला के गांव गटरी म भी चाय बगान तइयार होगे हावय। गुटरी चाय बगान म 25 हजार ले जादा चाय के पौधा मनके रोपण करे गे हावय। जानबा होवय के जशपुर जिला के जलवायु चाय बगान के खातिर उपयुक्त हावय। इहां सारूडीह अउ कांटबेल म बड़ संख्या म किसान मन डहर ले चाय के खेती करे जात हावय। ए लाभकारी फसल के खातिर जिला प्रशासन भी किसान मनला सरलग प्रोत्साहित करत हावय।

कृषि विभाग के अधिकारी मन बताइन के जिला के जलवायु चाय अउ कॉफी के  खेती के खातिर अनुकूल हावय। सारूडीह के चाय बगान ह प्रदेश म काफी प्रसिद्ध हो चुका। जशपुर आने वाला पर्यटक सारूडीह चाय बगान के सुन्दरता देखे बर जरूर आत हावयं। येकर संग ही मनोरा विकासखण्ड के कांटाबेल म भी 20 ले जादा किसान चाय के खेती करत हावयं।

जशपुर विकासखण्ड के गांव गुटरी म भी अब चाय के खेती होए लगे हावय। इहां किसान मन ह अपन खेत म 25 हजार पौधा मन के रोपण कर चुके हावयं अउ लगभग 45 हजार चाय के पौधा मन रोपण के लक्ष्य हावय। जिला म चाय के अलावा बने पाग होए के सेती काजू, नाशपाति, लीची अउ आलू के भी अच्छा पैदावार होत हावय।