अंजोर.दुर्ग, 20 सितंबर। मुख्यमंत्री दाऊ भूपेष बघेल दुर्ग जिला के सेलूद म आयोजित सहकारिता सम्मेलन म बेमेतरा म सहकारी बैंक के नवा भवन के घोसना करिस। ये भवन 96 लाख के लागत ले बनाये जाही। ओमन सहकारिता सम्मेलन म किहिन के सहकारिता कानून अतका कठिन होवत रिहिस के आम जनता के समझ म नइ आत रिहिस जेकर सेती ले ओला परेशानी होत रिहिस। हमन सरकार म आते ही ये कानून ल सरल करे के खातिर केहेन ताकि आम जनता के भी ये आसानी ल समझ म आएं अउ सहकारिता ले लाभ उठाना आसान हो।
मुख्यमंत्री ह किहिन के छत्तीसगढ़ पहिली अइसे राज्य हावय जेन सहकारिता के महत्व ल समझत इहां सोसाइटी के माध्यम ले धान के खरीदी शुरू होइस जेकर खातिर वासुदेव चंद्राकर जइसे पुरखा मनके बहुत बड़ा योगदान हावय। हमन किसान मन के खातिर न केवल कर्ज माफी बल्कि सिंचाई भी माफ करेन, येकर संग ही स्व सहायता समूह के कर्ज माफ करेन। भूमिहीन किसान मनके खातिर योजना सुरू करे गे हावय। ओमन किहिन के नरवा गरवा घुरवा बाड़ी के माध्यम ले हम तेजी ले ग्रामीण विकास ल बढ़ावा दे के दिशा म बुता करे हावन। प्रदेश म गोबर ले बिजली बनाये के संबंध म भी विचार होत हावय। गउठान के गोबर के बिजली ले गांव के स्ट्रीट लाइट, हालर मिल उक इही बिजली ले चल सकही। ओमन किहिन के गउठान आत्मनिर्भर ग्रामीण आजीविका केंद्र के रूप म विकसित होत हावयं जेकर ले स्थानीय महिला मन ल रोजगार के नवा संभावना विकसित होत हावय।
मुख्यमंत्री ह किहिन के धान खरीदी केन्द्र के संख्या के भी बढ़ाये गिस ताकि जनता ल कोनो रकम ले असुविधा नह होवे। पहिली 2000 धान खरीदी केंद्र रिहिस अब येकर संख्या बढ़के 2300 होगे हावय। येकर संग ही पहिली किसान मनके तहसील केंद्र तक आये म काफी दूरी तय करना पड़त रिहिस। हमन नवा तहसील बनायेन अउ अब 222 तहसील के माध्यम ले किसान मनके सुविधा आसान होगे हावय।
मुख्यमंत्री ह ए मउका म देवरबीजा बैंक शाखा म 40 लाख के लागत ले बने एटीएम के शुभारंभ करिन। उहे 15 लाख के लागत ले बने तरौद खातु गोदाम के भूमि पूजन भी करिन। ओमन पहांदा के शहीद परिवार के घर वाला ल 20 लाख रूपिया के चेक दिस। सेलूद अउ पतोरा के स्व-सहायता समूह नया सवेरा के वर्मी कंपोस्ट के वितरण ले मिले लाभांश रकम 37 हजार 597 अउ सत्य कबीर समहू के महिला मन ल 48 हजार 75 रूपिया के चेक दीस।
मुख्यमंत्री ह नंदोरी धान केंद्र म अपन कर्तव्य के खातिर जान गवाने वाला चौकीदार स्वर्गीय हरि शंकर वर्मा के पत्नी श्रीमती रेखा वर्मा के सहकारी बैंक डहर ले एक लाख रूपिया के मदद रकम दे गिस। साल 2020-21 म धान उपार्जन म शून्य प्रतिशत शॉर्टेज वाला कुल 19 समिति मन के उत्कृष्ट बुता करे के खातिर समिति के अध्यक्ष अउ प्रबंधक के प्रशस्ति पत्र के वितरण करिन। सम्मेलन म 311 समिति मन के 5000 प्रतिनिधि सामिल होइन। सहकारिता सम्मेलन म कृषि विभाग डहर ले शासकीय योजना मन ले संबंधित स्टॉल भी लगाए गे रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।